Top Social Icons

Left Sidebar
Left Sidebar
Featured News
Right Sidebar
Right Sidebar

சிறப்பு இணைப்பு

இலங்கை செய்திகள்

பிந்திய செய்திகள்

உலக செய்திகள்

எம்மவர் நிகழ்வுகள்

இந்திய செய்திகள்

சினிமா செய்திகள்

சுவிஸ் தமிழர் தொலைக்காட்சி செய்திகள்

மாணவர் அரங்கம்

itr fm

தொழிநுட்ப செய்திகள்

விளையாட்டு செய்திகள்

கவிஞர் அரங்கம்

Gift2Sri

Friday, March 29, 2019

இறுதிக்கட்டத்தை எட்டிய விஜய் ஆண்டனியின் ''தமிழரசன்'' !!

Currently online
விஜய் ஆண்டனி பொலிஸ் அதிகாரியாக நடிக்கும் ‘தமிழரசன்’. மிகப்பெரிய பொருட்செலவில் எஸ்.என்.எஸ்.மூவிஸ் சார்பில் கெளசல்யா ராணி தயாரிக்கும் இப்படத்தில் ரம்யா நம்பீசன் ஹீரோயினாக நடிக்கிறார்.

சுரேஷ் கோபி, சோனு சூட், சங்கீதா, கஸ்தூரி, ராதாரவி, ரோபோ சங்கர்,  சாயாசிங், மதுமிதா, ஒய்.ஜி.மகேந்திரன், கதிர், ஸ்ரீலேகா, ஸ்ரீஜா, கே.ஆர்.செல்வராஜ், செண்ட்ராயன், கும்கி அஸ்வின், மேஜர் கவுதம், சுவாமிநாதன், முனீஷ்காந்த், ராஜ்கிருஷ்ணா, ராஜேந்திரன் ஆகியோருடன் இயக்குநர் மோகன் ராஜாவின் மகன் மாஸ்டர் பிரணவும் முக்கிய வேடம் ஒன்றில் நடிக்கிறார்.

இளையராஜா இசையமைக்கும் இப்படத்திற்கு ஆர்.டி.ராஜசேகர் ஒளிப்பதிவு செய்ய, பழனிபாரதி, ஜெய்ராம் பாடல்கள் எழுதியுள்ளார்கள். அனல் அரசு ஆக்‌ஷன் காட்சிகளை வடிமைக்க, பிருந்தா, சதீஷ் ஆகியோர் நடம் அமைக்கின்றனர்.

ஆக்‌ஷன் படமாக உருவாகும் இப்படத்தின் படப்பிடிப்பு சென்னையில் பரபரப்பாக நடைபெற்று வந்த நிலையில், தற்போது இரண்டு கட்டப்படப்பிடிப்பு நிறைவடைந்துவிட்டது. இன்னும் சில நாட்களில் அடுத்தக் கட்டப் படப்பிடிப்பு தொடங்க உள்ளது. அத்துடன், படத்தின் முழு படப்பிடிப்பும் முடிவடைந்து பின்னணி வேலைகளில் படக்குழு ஈடுபட உள்ளது.

ரஷ்யாவில் சக்திவாய்ந்த நிலநடுக்கம் ; ரிக்டர் அளவுகோலில் 6.3 ஆக பதிவு !!

Currently online
ரஷ்யாவின் கிழக்கு பகுதியில் இன்று சக்திவாய்ந்த நிலநடுக்கம் ஏற்பட்டுள்ளது. 6.3 ரிக்டர் அளவில் ஏற்பட்ட இந்த நிலநடுக்கத்தால் ஏற்பட்ட பாதிப்புகள் தொடர்பான உடனடி தகவல் வெளியாகவில்லை.

ரஷ்யா நாட்டின் எல்லைக்குட்பட்ட தொலைதூர கிழக்கு பகுதியில் சுமார் 1250 கிலோமீட்டர் நீளமுள்ள காம்சட்கா தீபகற்பம் பகுதி அமைந்துள்ளது.

பசிபிக் பெருங்கடல் மற்றும் ஒகோட்ஸ்க் கடல்களுக்கு இடையில் அமைந்துள்ள இந்த தீபகற்பம் சுமார் 2 லட்சத்து 70 ஆயிரம் சதுர கிலோமீட்டர் நிலப்பரப்பை கொண்டதாகும். இப்பகுதியில் பூர்வகுடிகள் உள்பட சுமார் 3 லட்சம் மக்கள் வாழ்கின்றனர்.

இந் நிலையில், இன்று அதிகாலை இங்குள்ள தலைநகரம் பெட்ரோபாவ்கோவ்ஸ்க்-காம்சட்ஸ்கை பகுதியில் இருந்து சுமார் 300 கிலோமீட்டர் தூரத்தில் தெற்கே சக்திவாய்ந்த நிலநடுக்கம் ஏற்பட்டது. 

பூமியின் அடியில் சுமார் 40 கிலோமீட்டர் ஆழத்தில் மையம்கொண்ட இந்த நிலநடுக்கம் ரிக்டர் அளவுக்கோலில் 6.3 அலகுகளாக பதிவானது.

இன்றைய நிலநடுக்கத்தால் ஏற்பட்ட பாதிப்புகள் தொடர்பாக உடனடி தகவல் ஏதும் வெளியாகவில்லை. சுனாமி எச்சரிக்கையும் விடுக்கப்படவில்லை.

சூப்பர் டீலக்ஸ் திரை விமர்சனம் !!

Currently online
ஆரண்ய காண்டம் என்ற ஒரே படத்தின் மூலம் ஒட்டு மொத்த தமிழ் சினிமா ரசிகர்களையும் கவர்ந்த தியாகராஜன் குமாரராஜா பல வருடங்களுக்கு பிறகு இயக்கிய படம் தான் சூப்பர் டீலக்ஸ். 

இத்தனை வருட காத்திருப்பிற்கு ட்ரீட்டாக இருந்ததா இந்த சூப்பர் டீலக்ஸ், பார்ப்போம்.

கதைக்களம்
படத்தில் மொத்தம் 4 கதைகள், இவை ஒவ்வொன்றும் ஒவ்வொன்றுடன் தொடர்புடையதா என்றால், அதுவும் இல்லை. ஆனால், ஒருவர் செய்யும் விஷயம் மற்றவர்களுக்கு நன்மையா? தீமையா? ஏன் வாழ்க்கையில் இது நடக்கின்றது, இது ஏன் நடக்கவில்லை என்ற பல கேள்விகளுக்கு வாழ்க்கை அப்படியே தான் போகும் நாம் தான் அதை வாழவேண்டும் என்ற சித்தாந்தத்தில் முடிகிறது இந்த சூப்பர் டீலக்ஸ்.

படத்தை பற்றிய அலசல்
சூப்பர் டீலக்ஸ் இப்படத்தை கதையாக எங்கும் விமர்சனம் செய்ய முடியாது, காட்சியின் நகர்வுகளாகவே சொல்ல முடியும். 5 சிறுவர்கள் ஆபாச படம் பார்ப்பதற்காக ரெடியாக, அந்த படத்தில் ஒரு சிறுவனுடைய அம்மா (ரம்யா கிருஷ்ணன்) வர அதை பார்த்து கோபமாக டிவியை உடைத்துவிட்டு அம்மாவை கொல்வதற்கு புறப்பட்டு, அவனுக்கே ஆபாத்தாக முடிகிறது.

சமந்தா தன் பழைய காதலுடன் கள்ள உறவில் இருக்கும் போது காதலன் இறக்கிறான், அதை தன் கணவர் பஹத் பாசில் உதவியுடன் அப்புறப்படுத்த நினைக்கும் போது அவர் கடும் பிரச்சனை ஒன்றில் சிக்குகின்றார்.

விஜய் சேதுபதி திருமணம் முடிந்து சில மாதங்களில் தன் மனைவியை விட்டு ஓடி போய் நீண்ட வருடங்கள் கழித்து தன் மகனை பார்க்க திருநங்கையாக வீட்டிற்கு வர, இந்த சமூகம் அவரை மிக கிண்டலாகவும், கேலியாகவும் பார்க்கின்றது.

சரி இப்போது முதல் பேராவில் சொன்ன கதைக்கு வருவோம், டிவியை உடைத்து ஒரு நண்பன் ஓடிவிட்டான், மாலைக்குள் புது டிவி வாங்க வேண்டும், இல்லையென்றால் அப்பா தன்னை கொன்றே விடுவார் என்று அச்சப்படும் சிறுவன், மேலும் இரண்டு நண்பர்களுடன் சேர்ந்துக்கொண்டு டிவி வாங்க அலைகின்றனர்.

இந்த 4 கதைகளுக்கான முடிவு என்ன என்பது தான் சூப்பர் டீலக்ஸ் என்றாலும், இந்த 4 கதைகளும் சொல்ல வரும் கருத்துகள் தான் படத்தின் ஹைலைட். அதிலும் வசனம் தான் தியாகராஜா குமாரராஜா படத்தின் மிகப்பெரிய் ப்ளஸ், இதில் கூடுதலாக மிஷ்கின், நலன் குமாரசாமி போன்ற இயக்குனர்கள் வேலை செய்தது குறிப்பிடத்தக்கது.

பஹத் தன் மனைவி இப்படி செய்துவிட்டாள் என்ற கோபம் ஒரு புறம் இருக்க, இதிலிருந்து தன் மனைவியை காப்பாற்ற வேண்டும் என்ற ஏக்கம் ஒரு பக்கம் என செம்ம ஸ்கோர் செய்கின்றார். அதிலும் ஜாதி வெறி எவ்வளவு கொடியதோ அதே போல் நாட்டு பற்று, மொழி பற்று அனைத்தும் கொடியது தான், ஜாதி வெறி தவறு என்றால் இதுவும் தவறு தான் என அவர் பேசும் வசனம் எல்லாம் செம்ம.

விஜய் சேதுபதி தன் அத்தனை குமுறலையும் மனதில் வைத்துக்கொண்டு மகனுக்காக ஊருக்கு வருவது, வந்த இடத்தில் அவர் காவல் நிலையத்திற்கு செல்லும் நிலை ஏற்பட, அந்த காவல் நிலையத்தில் விஜய் சேதுபதியை நடத்தும் விதம், ஒரு கட்டத்தில் தாங்க முடியாமல் போலிஸையே அவர் அடித்து தலையில் அடித்து சாபம் விடுவது, கடைசியில் கடவுளையே உலகம் என நம்பியிருக்கும் மிஷ்கினிடம் தன் பாவங்களை சொல்லி அழும் இடத்தில் விஜய் சேதுபதி தனித்து நிற்கின்றார்.

போலிஸ்காரராக பக்ஸ் நடித்துள்ளார், அப்படி சொல்வதை விட மிரட்டியுள்ளார், சிரித்துக்கொண்டே அவர் செய்யும் விஷயம் எல்லாம் நமக்கே பயத்தை ஏற்படுத்துகின்றது, அவர் மேல் கடும் கோபத்தையும் உண்டாக்குகின்றது, ஒரு இடத்தில் ‘என் பொண்டாட்டி பத்தினி அவ சாபமே பலிக்காது, இவ சாபம் எங்க பலிக்கும்’ என்று விஜய் சேதுபதியை கிண்டல் செய்துவிட்டு அடுத்த காட்சியிலேயே பக்ஸுக்கும் நடக்கும் விஷயம், அதே போல் தன் கள்ள உறவு வைத்திருந்த தன் மனைவி சமந்தாவை பார்த்து பஹத் ஆமா இவ பெரிய பத்தினி இவ சொன்னா கரெண்ட் வந்துரும் பாரு, என்று சொல்லி முடித்ததுமே கரெண்ட் வருவது என தியாகாராஜா குமாரராஜா டச் பல இடங்களில் ஜொலிக்கின்றது, குறியீடு ரசிகர்களுக்கு கொண்டாட்டம் தான்.

மேலும், படத்தில் டிவிக்காக அலையும் அந்த மூன்று சிறுவர்கள், அற்புதம் செய்துள்ளனர், அத்தனை பிரச்சனைகளிலும் கேஷுவலாக இருப்பது, ‘ஏன் காஜி நீ ஏண்டா இவ்வளவு காஜியாக இருக்க’, அதெல்லாம் முடியாது எல்லாம் முடிஞ்சுருச்சு இப்ப நா பிட்டு படம் பாக்கனும் என்று சொல்வது என கலக்கியுள்ளனர்.

ரம்யா கிருஷ்ணன் ஆபாச பட நடிகையாக வந்தாலும், கடைசியில் லட்சம் பேர் ஆபாச படம் பார்க்கின்றனர், அவர்களுக்கு இல்லாத குற்ற உணர்வு அதில் நடித்த எனக்கு ஏன் வரவேண்டும் என அவர் சொல்லும் இடம் சிறப்பு.

க்ளாப்ஸ்
படத்தில் நடித்த அனைவருமே சிறப்பாக நடித்துள்ளனர்.

படத்தின் டெக்னிக்கல் விஷயங்கள், ஒரு நல்ல இசையமைப்பாளருக்கு ஒரு காட்சிக்கு இசை தேவையா என்ற புரிதலே சிறப்பு, அதுபோல் எங்கு இசை வரவேண்டும், அது எப்படி வரவேண்டும் என்பதை உணர்ந்து யுவன் அதகளம் செய்துள்ளார். அதிலும் கேங்ஸ்டர் ஒரு சிறுவனை துரத்த, அங்கு மாங்குயிலே பூங்குயிலே பாடல் போல் இசையமைத்தது எல்லாம் க்ளாஸ், அதே நேரத்தில் சமந்தா, பஹத் பாசில் காட்சிகள் எல்லாம் இசையே நமக்கு பயத்தை கடத்துகின்றது.

படத்தின் ஒளிப்பதிவு, பல கலர்ஸ் படத்தில் வந்து செல்கின்றது, படம் முழுவதுமே வெளிச்சமாக இருந்தாலும், அத்தனை துல்லியமாக ஒவ்வொரு காட்சியும் உள்ளது.

பல்ப்ஸ்
அனைத்து தரப்பு மக்களுக்கும் பிடிக்குமா என்றால் கேள்விக்குறி தான், அதே நேரத்தில் சினிமாவை விரும்புவோர்களுக்கு செம்ம ட்ரீட்.

மொத்தத்தில் சூப்பர் டீலக்ஸ் சொல்ல வருவது வாழ்க்கை வாழ்வதற்கே, அதை வாழ்ந்து தான் ஆகனும் என்பதே, தமிழில் ஒரு உலக சினிமா.

ஹெச்.ராஜா கடைந்தெடுத்த அயோக்கிய அரசியல்வாதி ; மு.க.ஸ்டாலின் ஆவேசம் !!

Currently online
இந்தியாவிலேயே ஹெச்.ராஜாவைப் போன்ற அயோக்கிய அரசியல்வாதியை நாம் பார்க்க முடியாது என திமுக தலைவர் மு.க.ஸ்டாலின் விமர்சித்துள்ளார்.

திமுக தலைவர் மு.க.ஸ்டாலின் இன்று(29), சிவகங்கை நாடாளுமன்றத் தொகுதியில் போட்டியிடும் காங்கிரஸ் கட்சி வேட்பாளர் கார்த்தி சிதம்பரத்தையும், மானாமதுரை சட்டப்பேரவை இடைத்தேர்தலில் போட்டியிடும் திமுக வேட்பாளரையும் ஆதரித்து உரையாற்றினார்.

"வாரிசு அடிப்படையில் அல்ல தகுதியின் அடிப்படையில் தான் கார்த்தி சிதம்பரம் இன்றைக்கு வேட்பாளராக நிறுத்தப்பட்டு இருக்கின்றார்.

பாஜக சார்பில் நிறுத்தப்பட்டுள்ள ஹெச்.ராஜாவை எதிர்க்கட்சியின் வேட்பாளராக நான் பார்க்கவில்லை. தமிழகத்தில் ஏன் இந்தியாவிலேயே இதுபோன்று ஒரு கடைந்தெடுத்த அயோக்கிய அரசியல்வாதியை நாம் இதுவரையில் பார்த்திருக்க முடியாது. இனிமேலும் பார்க்கவும் முடியாது.

தமிழ் சமுதாயத்தின் நல்லிணக்கத்தை, நிம்மதியை கெடுக்கக்கூடிய வகையில் பேசுவது, வாய்க்கு வந்தபடியெல்லாம் உளறுவது, கலவரத்தை நடத்துவதற்குத் தூண்டுவது, கலவரத்தை நடத்துவது, பொய்களே பேசிக் கொண்டிருப்பது, அவதூறு மட்டும் பேசிக்கொண்டிருப்பது தான் ஹெச்.ராஜாவின் தொழிலாகவே இருந்து கொண்டிருக்கின்றது.

பாஜகவில் இருக்கக்கூடிய அனைவரையும் நான் சொல்ல மாட்டேன். அவர்களுடைய கொள்கையில் எனக்கு உடன்பாடு இல்லாமல் இருக்கலாம். அவர்கள் சொல்வதை நாங்கள் விமர்சிக்கலாம். அதுபோல் நாங்கள் சொல்வதை அவர்கள் விமர்சிக்கலாம், அது வேறு. அது அரசியல் பண்பாடு. அரசியல் ரீதியாக - தத்துவ ரீதியாக - கொள்கை ரீதியாக - விமர்சிப்பது என்பது ஜனநாயகத்தின் உரிமை. ஆனால், கொச்சைப்படுத்தி கலவரம் தூண்டுவதில், அசிங்கத்தை ஏற்படுத்தக்கூடிய நிலையில் இருக்கக்கூடியவர்தான் ஹெச்.ராஜா.

இப்படிப்பட்ட ஒருவர் நாடாளுமன்றத்திற்குப் போனால், அது நாடாளுமன்றத்துக்கே அவமானம். நாடாளுமன்றத்திற்குச் சென்றும் இதுபோன்ற நடவடிக்கைகளில் தான் ஈடுபட்டுக் கொண்டிருப்பார் என்று சொன்னால், அங்கு இருக்கக்கூடியவர்கள் என்ன சொல்வார்கள்? இவர் எந்தத் தொகுதியில் இருந்து வந்திருக்கின்றார்? என்ற ஒரு கேள்வி வருகின்ற பொழுது, சிவகங்கை தொகுதியில் இருந்து வந்திருக்கின்றார் என்று சொன்னால், இந்த சிவகங்கை தொகுதியில் இருக்கக்கூடிய மக்களுக்கு ஏற்படக்கூடிய அவமானம்" இவ்வாறு ஸ்டாலின் கூறியுள்ளார்.

ஜம்மு காஷ்மீரில் தீவிரவாதிகள் இருவர் சுட்டுக்கொலை !!

Currently online
ஜம்மு காஷ்மீரில் இன்று நடைபெற்ற துப்பாக்கி சண்டையில் 2 தீவிரவாதிகள் சுட்டுக் கொல்லப்பட்டுள்ளனர்.

ஜம்மு காஷ்மீரின் புல்வாமா பகுதியில் கடந்த மாதம் பெப்ரவரி 14ம் திகதி காஷ்மீரின்  நடத்தப்பட்ட தாக்குதலில் 40 சிஆர்பிஎப் வீரர்கள் பலியாகினர். இதையடுத்து ஜம்மு காஷ்மீரின் எல்லைப்பகுதிகளிலும், பொது இடங்களிலும் பாதுகாப்புப் படையினர் தீவிர கண்காணிப்பில் ஈடுபட்டு வருகின்றனர்.

இந் நிலையில் ஜம்மு காஷ்மீரின் பத்காம் பகுதியில் தீவிரவாதிகள் ஊடுருவி இருப்பதாக ராணுவத்திற்கு தகவல் கிடைத்ததை அடுத்து பாதுகாப்புப்படையினர் அப்பகுதிக்கு விரைந்து தீவிரவாதிகளை சுற்றி வளைத்தனர். 

அப்போது நடந்த துப்பாக்கி சண்டையில் 2 தீவிரவாதிகள் சுட்டுக் கொல்லப்பட்டனர். துப்பாக்கி சண்டை முடிவடைந்த நிலையில், 4 இராணுவ வீரர்கள் படுகாயமடைந்துள்ளனர்.

நேர் கொண்ட வீரம்...............!!!!!! கூடலூர் சிந்துஷன்

Currently online
நேர் கொண்ட எம் வீரம் 
ஓயாது ஒரு நாளும்
சீர் கொண்ட எம் தேசம் 
பணியாது பகை கண்டு!

காலங்கள் மாறினாலும்
கனவுகள் ஓய்வதில்லை
கோலங்கள் நேர் எதிரே
கொள்கைகள் மாறுவதில்லை!

வாள் கொண்டு நாம் செய்த 
யாகங்கள் மறக்கவில்லை 
வாளோடு எம் வாழ்வு 
வல்லமைகள் மாறவில்லை!

உலகையே ஆண்ட இனம்
உள்ளுக்குள் அழுவதுவோ
உரிமைகள் ஏதுமின்றி 
ஊனமாகி திரிவதுவோ!

பெரு திசை நான்கிலும் 
பெயரை ஒலிக்க செய்வோம்
பார் எங்கும் தடம் பதித்து
மீண்டும் தலை நிமிர்வோம்!

          நன்றி 
கூடலூர் சிந்துஷன்

காலை உணவை தவிர்த்தால் நீரிழிவு நோய் ஏற்பட வாய்ப்பு ; ஆய்வில் தகவல் !!

Currently online
காலை உணவை தவிர்ப்பது அல்லது குறைப்பதன் மூலம் நீரிழிவு நோய் ஏற்படும் என்று ஆய்வில் தெரியவந்துள்ளது.

'அன்றாடப் பணிகள்' என்கிற அசுரன் நம் தினத்தைக் காவு வாங்கக் காத்திருக்கும் காலைப்பொழுதில் பலருக்கும் மார்னிங் டிபன் என்பது எதையோ அவசரமாகக் கொறிப்பது மட்டுமே. ` பிரேக்ஃபாஸ்ட்டைத் தவிர்க்காதீர்கள்!', `ஒன்பது மணிக்குள் சாப்பிட்டுவிடுங்கள்', `காலை உணவுதான் அன்றைக்கு முழுமைக்குமான சக்தியை உடலுக்குக் கொடுக்கும்'... திரும்பத் திரும்ப மருத்துவர்கள் வலியுறுத்தும் விஷயங்கள். அப்படிச் சாப்பிடுபவை சத்தானவையாக இருப்பது சிறந்தது. 

நம்மில் சிலர் காலை உணவை முற்றிலுமாக தவிர்த்து விடுவோம். அப்படி தவிர்ப்பதால், நீரிழிவு நோய் ஏற்படும் என்று ஆய்வில் தெரியவந்துள்ளது. 

இது குறித்து சர்வதேச அளவில் ஒரு லட்சம் பேரிடம் அமெரிக்க நிறுவனம் ஒன்று ஆய்வு மேற்கொண்டது. இதில் சர்வதேச அளவில் 30 சதவீதம் பேர் காலை உணவை தவிர்க்கின்றனர். வாரத்தில் குறைந்தது 4 நாட்களுக்கு காலை உணவு சாப்பிடாவிட்டால் 2-வது பிரிவு நீரிழிவு நோய் ஏற்பட 55 சதவீதம் வாய்ப்பு உள்ளது தெரியவந்துள்ளது.

இந்தியாவில் கிராமப்புற மக்களை விட நகர்புற மக்களே அதிக அளவில் காலை உணவை தவிர்க்கின்றனர். நீரிழிவு நோய் ஏற்பட காலை உணவை தவிர்ப்பதும் ஒரு காரணம் என்பதை உலக சுகாதார நிறுவனமும் உறுதி செய்துள்ளது. 

நீரிழிவு நோயை தடுக்க தவறாமல் காலை உணவை எடுத்துக் கொள்ள வேண்டும் என நிபுணர்கள் தெரிவித்துள்ளனர்.

முதல் குழந்தை பிறந்து 26வது நாளில் இரட்டை குழந்தைகளை பெற்றெடுத்த பெண் !!

Currently online
வங்க தேசத்தில் முதல் குழந்தை பிறந்த 26வது நாளில் மீண்டும் இரட்டை குழந்தைகளை ஒரு பெண் பெற்றெடுத்த சம்பவத்தால் மருத்துவர்கள் வியப்படைந்துள்ளனர்.

வங்க தேசத்தின் தென்மேற்கு பகுதியில் உள்ள ஜெஸ்ஸோரே மாவட்டத்தில் உள்ள ஒரு கிராமத்தைச் சேர்ந்தவர் சுல்தானா(20). இவருக்கு பெப்ரவரி மாத இறுதியில் ஆண் குழந்தை பிறந்தது. இந்த குழந்தை மருத்துவர்கள் குறித்த காலத்துக்கு முன்பே பிறந்துவிட்டது.

இந் நிலையில 25 நாட்களுக்கு பிறகு கடந்த மார்ச் 22ம் திகதி சுல்தானாவுக்கு கடும் வயிற்று வலி ஏற்பட்டுள்ளது. இதனால் அவரை ஜெசோர் ஆத் தீன் மருத்துவமனைக்கு கொணடு சென்றனர்.

அங்கு சுல்தானாவை மருத்துவர் ஷீலா பொத்தார் பரிசோதனை செய்து பார்த்தார். அப்போது ஸ்கேன் பரிசோதனையும் செய்து பார்த்தார். அதில் சுல்தானாவுக்கு இரட்டை கர்ப்பப்பை இருப்பதை கண்டுபிடித்தார். ஏற்கனவே ஆண்குழந்தை பிறந்த நிலையில், மற்றொரு கர்ப்பப்பையில் இரட்டை குழந்தை இருப்பதையும் கண்டறிந்தார்.

இதையடுத்து வியப்படைந்த மருத்துவர் ஷீலா பொத்தார், அறுவை சிகிச்சை செய்து குழந்தையை வெளியே எடுக்க முடிவு செய்தார். இதன்படி ஏற்பாடுகள் செய்யப்பட்டு உடனே அறுவை சிகிச்சை செய்யப்பட்டது. அப்போது சுல்தானாவுக்கு ஒரு ஆண், ஒரு பெண் என இரட்டை குழந்தை பிறந்தது. 

முதல் குழந்தை பிறந்த 25 நாளில் மீண்டும் இரட்டை குழந்தைகள் பெற்றெடுத்த பெண்ணை மருத்துவர்கள் நான்கு நாட்கள் சிகிச்சை அளித்து அவரை பத்திரமாக வீட்டுக்கு அனுப்பி வைத்தனர். தாயும் குழந்தைகளும் தற்போது நலமுடன் இருக்கிறார்கள்.

இரட்டை கர்ப்பப்பை ஒரு பெண்ணுக்கு இருப்பது அரிதான நிகழ்வாகும். 

இதுகுறித்து விளக்கம் அளித்த மருத்துவர் ஷீலா பொத்தார், அந்த பெண்ணுக்கு முதல் குழந்தை பிறந்த நிலையில், மற்றொரு கர்ப்பபையில் இரட்டை குழந்தைகள் இருப்பது முதலில் தெரியாது. தற்போது குழந்தைகள் ஆரோக்கியமாக உள்ளன. எல்லாம் நன்றாக முடிந்துவிட்டது என்றார். இதனிடையே அந்த பெண் பிறக்கும் போதே இரட்டை கர்ப்பப்பையுடன் பிறந்திருக்கக்கூடும் என்றும், அதனால் தான் அவருக்கு இரட்டை கர்ப்பப்பை இருப்பதற்கான எந்த அறிகுறியும் தெரியாமல் இருந்துள்ளதாக மருத்துவ நிபுணர்கள் தெரிவித்துள்ளனர்.

பன்னீர் பக்கோடா செய்யலாமா ?

Currently online
தேவையான பொருட்கள்

பன்னீர் – 2 கப்
கடலை மா – 2 கப்
சாட் மசாலாத்தூள் – 1 டேபிள் ஸ்பூன்
மிளகாய்த்தூள் – தேவையான அளவு
சோள மா – 1 டேபிள் ஸ்பூன்
எண்ணெய், தண்ணீர் – உப்பு – தேவையான அளவு


செய்முறை

பன்னீரை சிறு துண்டுகளாக நறுக்கிக் கொள்ள வேண்டும்.

கடலை மா, சோள மா, மிளகாய்த்தூள், சாட் மசாலாத்தூள், உப்பு, தண்ணீர் ஆகியவற்றை ஒன்றாக சேர்த்து பிசைந்து கொள்ள வேண்டும்.

பின்னர் இந்த கலவையை பன்னீர் துண்டுகளுடன் சேர்த்து கிளறிக்கொள்ள வேண்டும்.

ஒரு பாத்திரத்தில் எண்ணெய் ஊற்றி அது சூடானதும் பன்னீர் கலவை துண்டுகளை போட்டு பொரித்தெடுத்தால் சுவையான பன்னீர் பக்கோடா ரெடி.

பெண்களுக்கு கற்பு எவ்வளவு முக்கியமானதோ அதைப்போல ஓட்டும் மிக முக்கியம் !!

Currently online
நாடாளுமன்ற தேர்தலுக்கு அனைத்து கட்சிகளும் போட்டா போட்டி தேர்தல் பிரசாரம் செய்து வருகின்றன. 

இரு திராவிட கட்சிகளுக்கு சவால் விடும் படியாக நாம் தமிழர் கட்சியின் ஒருங்கிணைப்பாளர் சீமான் வேட்பாளர்களை அறிவித்து பிரசாரம் செய்து வருகிறார்.

இன்று தருமபுரியில் உள்ள அரூர்  பகுதியில் நாம் தமிழர் கட்சியின் தேர்தல் பரப்புரை நடைபெற்றது. அப்போது தருமபுரி மக்களவைத் தொகுதியில் வேட்பாள் ருக்மணி தேவியையும், அரூர் சட்டமன்றத் தொகுதி வேட்பாளர் திலீப் பாப்பிரட்டிபட்டி சட்டமன்றத் தொகுதி வேட்பாளரான சதீஸ் ஆகியோருக்கு ஆதரவாக சீமான் பிரச்சாரம் செய்தார்.

அப்போது அவர் பேசியதாவது:

தமிழ்நாட்டில் ஹட்ரோ கார்பன், நெடுவாசல், விவசாயம் பாதிப்பு ஆகியவற்றிற்கு தற்சமயம் ஆட்சியில் இருப்போர் ஒருமுறை கூட வந்து மக்களைப் பார்க்கவில்லை. ஒட்டுக்கு பணம் கொடுக்க வருவார்கள். அதனால் பணத்துக்கு ஓட்டுப்போட வேண்டாம். 

பெண்களுக்கு கற்பு எவ்வளவு முக்கியமானதோ அதைப் போல ஓட்டும் மிகமுக்கியம் எனவே ஓட்டை விற்க வேண்டாம் என சீமான் தெரிவித்துள்ளார்.

ஐ.பி.எல். கிரிக்கெட் ; ஐதராபாத் - ராஜஸ்தான் இன்று பலப்பரீட்சை !!

Currently online
ஐ.பி.எல்., கிரிக்கெட் தொடரின் 8-ஆவது லீக் போட்டியில் சன் ரைசர்ஸ் ஐதராபாத் அணியும், ராஜஸ்தான் ராயல்ஸ் அணியும் ஐதராபாத்தில் இன்று மோதுகின்றன.

கடந்த சனிக்கிழமை தொடங்கிய 12வது ஐபிஎல் கிரிக்கெட் தொடர் பல்வேறு சர்சைகளையும் தாண்டி விறுவிறுப்பாக நடந்து வருகிறது. 

இன்றைய போட்டியில், கடந்த ஆட்டத்தில் கொல்கத்தாவிடம் தோல்வி அடைந்த, ஐதராபாத் அணியும், பஞ்சாப்பிடம் தோல்வியடைந்த ராஜஸ்தான் அணியும் பலப்பரீட்சை நடத்துகின்றன.

இவ்விரு அணிகளும் தோல்வியடைந்த போட்டியில் போராடியே தோல்வி அடைந்தது குறிப்பிடத்தக்கது. இதனால் இரண்டு அணிகளையும் படுலேசில் எடைப் போட வேண்டாம். சென்ற போட்டியில் காயத்தால் விளையாட ஐதராபாத் அணி கேப்டன் கேன் வில்லியம்சன், இன்று விளையாடுவார் என்று தெரிகிறது. ஓராண்டு தடைக்கு பிறகு, அணிக்கு திரும்பி கடந்த ஆட்டத்தில் அதிரடி காட்டிய டேவிட் வார்னர், அதே அதிரடியை இன்றும் தொடங்கினால், ராஜஸ்தானுக்கு ஆபத்தாகிவிடும்.

ஜோஸ் பட்லரை  'மன்கட்' முறையில் அஸ்வின் செய்த ரன்-அவுட்டால் வெற்றியை நோக்கி சென்ற ராஜஸ்தான்  தோல்வியடைந்து. இது அந்த அணி வீரர்களுக்கு கடுப்பை ஏற்றியது. அதிலிருந்து மீண்டு(ம்) வந்து, இன்றைய போட்டியில் வெற்றி பெற ஸ்மித், பட்லர், ஸ்டோக்ஸ் அதிரடி காட்டினால், போட்டி சூப்பராக இருக்கும் என்பதில் சந்தேகமே இல்லை.

ஐபிஎல் கிரிக்கெட்டில் இவ்விரு அணிகளும் இதுவரை நேருக்கு நேர் 9 முறை மோதியுள்ளன. இதில், ஐதராபாத் 5 முறையும், ராஜஸ்தான் 4 முறையும் வெற்றி பெற்றுள்ளன.

இந்த போட்டி ஐதராபாத்தில் உள்ள ராஜீவ்காந்தி மைதானத்தில் இரவு 8 மணிக்கு தொடங்குகிறது.

வாகன விபத்துக்களால் நாளொன்றுக்கு 08 பேர் உயிரிழப்பு !!

Currently online
பொலிஸ் தலைமையகத்தில் நேற்று இடம்பெற்ற ஊடகவியலாளர் சந்திப்பின் போது வாகன விபத்து காரணமாக நாளொன்றுக்கு சுமார் 08 பேர் உயிரிழப்பதாக பொலிஸ் ஊடகப் பேச்சாளர் ருவன் குணசேகர கூறியுள்ளார். 

மேலும் அவர் தெரிவிக்கையில், பல வீதி விபத்துக்களுக்கு சாரதிகள் போன்றே வீதிப் பயணிகளும் பொறுப்பேற்க வேண்டும் என கூறியுள்ளார். 

அத்துடன் வீதி விபத்துக்களில் உயிரிழப்போரில் பெரும்பாலானோர் மோட்டார் சைக்கிள் சாரதிகளும் அதில் செல்வோரும் என சுட்டிக் காட்டியுள்ளார். 

இதேவேளை நடை பயணிகளும் அதிகமாக உயிரிழப்பதாகவும், அதற்கு அவர்கள் பொறுப்பேற்க வேண்டும் என்றும் பொலிஸ் ஊடகப் பேச்சாளர் ருவன் குணசேகர தெரிவித்துள்ளமை குய்ப்ப்பிடத்தக்கது.

சா/ தர பெறுபேறுகளுக்கமைய 71 சதவீதத்திற்கு மேலானோர் உயர்தரம் கற்க தகுதி !!

Currently online
நேற்று வெளியான 2018ஆம் ஆண்டிற்குரிய கல்விப் பொது தராதர சாதாரண தரப் பரீட்சை பெறுபேறுகளுக்கு அமைய தோற்றிய பரீட்சார்த்திகளில் 71 சதவீதத்திற்கு மேலானோர், உயர்தர வகுப்புகளில் கல்வியை தொடர்வதற்கு தகுதி பெற்றிருப்பதாக பரீட்சைகள் திணைக்களம் தெரிவித்துள்ளது.

2018 ஆம் ஆண்டு இடம்பெற்ற கல்வி பொது தராதர சாதாரண தர பரீட்சைக்காக ஆறு இலட்சத்து 56 ஆயிரத்து 984 பேர் விண்ணப்பித்திருந்தனர்.

அதில் ஐந்து இலட்சத்து 18 ஆயிரத்து 184 பேர் பரீட்சைக்காக தோற்றியிருந்தனர். இதில் 71.66 சதவீதமானோர் கல்விப் பொதுத்தராதர உயர் தரத்தை தொடர்வதற்கு தகுதி பெற்றுள்ளனர்.

இவர்களில் ஒன்பதாயிரத்து 413 பேர் ஒன்பது பாடங்களுக்கும் ஏசித்தி  பெற்றுள்ளனர்.

உலகிலேயே மிக நீளமான உப்பு குகை இஸ்ரேலில் கண்டுபிடிப்பு !!

Currently online
உலகிலேயே மிகநீளமான உப்பு குகை இஸ்ரேல் நாட்டில் கண்டுபிடிக்கப்பட்டுள்ளது. அதற்கு ‘மால்கம்’ என பெயரிட்டுள்ளனர்.

சாக்கடல் எனப்படும் ‘டெட் சீ’யை ஒட்டி தென் மேற்கு மூலையில் இது அமைந்துள்ளது. இந்த குகை ‘சோடாம்’ என்று அழைக்கப்படும் மலையை ஒட்டி செல்கிறது. இது சுமார் 10 கி.மீட்டர் (6.5 மைல்) நீண்டு கிடக்கிறது. 

குகைக்குள் உப்பு படிகங்கள் அதன் கூரைப்பகுதியான மேற்பரப்பில் தொங்குகின்றன. குகையின் சுவர்களில் படிந்து கிடக்கின்றன. அதில் இருந்து உப்புநீர் சொட்டு சொட்டாக கசிகிறது.

ஹீப்ரோ பல்கலைக்கழகத்தின் குகை ஆராய்ச்சி மைய நிறுவனரும், இயக்குனருமான அமோஸ் புரூம்கிம் தலைமையிலான குழுவினர் கடந்த 1980ம் ஆண்டுகளில் இவற்றை கண்டுபிடித்தனர்.

தற்போதுள்ள பகுதியில் இருந்து 5 கி.மீ பரப்பளவுக்குள் இருக்கும் என கணக்கிட்டனர். 2006-ம் ஆண்டில் தெற்கு ஈரானின் கெசிம் தீவில் இருந்து 6 கி.மீட்டர் தூரத்தில் குகை இருப்பதையும், அதற்குள் உப்பு பாறை படிமங்களாக இருப்பதையும் அறிந்தனர். 

சா /தரப் பெறுபேறுகளை மீள் திருத்தம் செய்யும் திகதி அறிவிப்பு !!

Currently online
கடந்த 2018 ஆம் ஆண்டு டிசம்பரில் நடைபெற்ற க.பொ.த. சாதாரணதரப் பரீட்சை பெறுபேறுகள் நேற்று (28) வெளியாகின.

இந்நிலையில் பரீட்சை பெறுபேறு மீள்திருத்த நடவடிக்கைக்காக, எதிர்வரும் ஏப்ரல் 12ஆம் திகதிவரை பரீட்சார்த்திகள் தமது விண்ணப்பங்களைச் சமர்ப்பிக்க முடியும் என பரீட்சைகள் திணைக்களம் அறிவித்துள்ளது.

மீள்திருத்தத்திற்காக விண்ணப்பிக்க விரும்பும் பாடசாலை மாணவர்கள் தத்தமது பாடசாலை மூலமாக விண்ணப்பிக்க வேண்டும் என்பதோடு, தனிப்பட்ட பரீட்சார்த்திகள் பத்திரிகை விளம்பரங்களை பின்பற்ற வேண்டும் எனவும் பரீட்சைகள் திணைக்களம் கேட்டுக்கொண்டுள்ளது.  

சாதாரண தரப் பரீட்சையில் 9 ஆயிரத்து 413 பேருக்கு 9A சித்தி !!

Currently online
பரீட்சைகள் திணைக்களத்தால் 2018ஆம் ஆண்டுக்கான கல்வி பொது தராதர சாதாரண தரப் பரீட்சைப் பெறுபேறுகள் நேற்று(28) நள்ளிரவு வெளியிடப்பட்டுள்ளன.

அதற்கமைய இம்முறை கல்வி பொது தராதர சாதாரண தரப் பரீட்சையில் 9 ஆயிரத்து 413 பேர் ஒன்பது பாடங்களிலும் A சித்திகளை பெற்றுள்ளதாக கல்வியமைச்சர் அகில விராஜ் காரியவசம் தெரிவித்துள்ளார்.

எனினும் முதல் 10 இடங்களில் தமிழ் மொழிமூலம் தோற்றிய மாணவர்கள் எவரும் இடம்பெறவில்லை.

பரீட்சைப் பெறுபேறுகளுக்கு அமைய கொழும்பு விசாகா மகளிர் கல்லூரியின் மாணவி, நிலக்னா வர்ஸ வித்தான அகில இலங்கை ரீதியில் முதலாவது இடத்தை பெற்றுள்ளார்.

விசேடமாக இரண்டாவது இடத்தை மூன்று பேர் பெற்றுள்ளனர்
விசாகா மகளிர் கல்லூரியின் மாணவி சஜித்தி ஹங்சதி, 
கம்பஹா ரத்னாவலி மகளிர் மகா வித்தியாலயத்தின் மாணவி சஞ்சானி திலேக்கா குமாரி, 
மாத்தறை சுஜாதா வித்தியாலயத்தின் மாணவி மிந்தி ரெபேக்கா 

ஐந்தாவது இடத்தை கேகாலை புனித ஜொசப் கல்லூரியின் மாணவி கயத்ரி ஹர்சிலா லிஹனி கடுவாரச்சி பெற்றுள்ளார்.

ஆறாவது இடத்தை ஐந்து பேர் பெற்றுள்ளனர். 
கொழும்பு தேவி பாலிகா மகா வித்தியாலயத்தின் மாணவி சந்தலிமுத்துனிமா ரத்நாயக, 
கொழும்பு ரோயல் கல்லூரியின் மாணவன் சஹான் யசங்க சமரகோண், 
கொழும்பு ரோயல் கல்லூரியின் சேர்ந்த மாணவன் கவிரு மெத்னுக்க, 
காலி மஹிந்த கல்லூரியின் சஸ்மித்த ஆகாஸ்வர லியனகே ஹொரணை தக்சிலா கல்லூரியின் மாணவி ஹமாசி ஹெரந்திகா

நாளை காலை 9 மணி முதல் கொழும்பின் சில பகுதிகளில் 24 மணித்தியால நீர்வெட்டு !!

Currently online
நாளை(30) காலை 9 மணி முதல் கொழும்பின் சில பகுதிகளில் 24 மணித்தியால நீர்வெட்டு அமுல்படுத்தப்படவுள்ளதாக தேசிய நீர் வழங்கல் மற்றும் வடிகாலமைப்புச் சபை தெரிவித்துள்ளது.

அத்தியாவசிய திருத்தப் பணிகள் மற்றும் மின்சார விநியோகம் துண்டிப்பு காரணமாகவே இவ்வாறு நீர்வெட்டு அமுல்படுத்தப்படவுள்ளதாக, தேசிய நீர் வழங்கல் மற்றும் வடிகாலமைப்புச் சபை தெரிவித்துள்ளது.

அதற்கமைய கொழும்பு, கோட்டே, தெஹிவளை, கல்கிஸை, கடுவெல, மஹரகம, இரத்மலானை ஆகிய பகுதிகளிலேயே இந்த நீர்வெட்டு அமுல்படுத்தப்படவுள்ளமை குறிப்பிடத்தக்கது.


Thursday, March 28, 2019

முன்னணி நடிகர்கள் வாங்கும் சம்பளம் எவ்வளவு தெரியுமா?

Currently online
தமிழ் சினிமாவின் முன்னணி நடிகர்களாக இருக்கும் பெரிய நடிகர்கள் அனைவரும் இப்போது நடிக்கும் படங்களுக்கு எவ்வளவு சம்பளம் வாங்குகிறார்கள் என்பது தெரியுமா?



முழு விவரம் இதோ 

ரஜினி- ரூ. 60 கோடி
விஜய்- ரூ. 50 கோடி
அஜித்- ரூ. 35 கோடி
கமல்ஹாசன்- ரூ. 25 முதல் 30 கோடி
சூர்யா- ரூ. 20 முதல் 22 கோடி
விக்ரம்- ரூ. 20 கோடி
சிவகார்த்திகேயன்- ரூ. 15 கோடி
விஜய் சேதுபதி- ரூ. 8 கோடி
சிம்பு- ரூ. 7 முதல் 8 கோடி
ஜீவா- ரூ. 2 முதல் 3 கோடி
விஷால், ஆர்யா, சந்தானம்- ரூ. 3 முதல் 5 கோடி
ஜெயம் ரவி- ரூ. 4 முதல் 5 கோடி

ஒரு தாய்க்கு பிறந்த இரட்டை குழந்தைகளுக்கு வெவ்வேறு தந்தை !!

Currently online
சீனாவை சேர்ந்த இளம்பெண் ஒருவருக்கு பிறந்த இரட்டை குழைந்தைகளுக்கு இருவேறு தந்தை இருப்பதாக அதிர்ச்சி தகவல் வெளியாகியுள்ளது.

சீனாவின் சியாமின் மாகாணத்தைச் சேர்ந்த இளம்பெண் ஒருவருக்கு கடந்த ஆண்டு இரட்டை ஆண் குழந்தை பிறந்துள்ளது. இரு வேறு ஜாடைகளில் பிறந்த குழந்தைகளில் ஒன்றை மட்டும் தந்தை வெறுத்து வந்துள்ளார். தனது ஜாடையில் இல்லை எனவும் மனைவியிடம் சண்டையிட்டு வந்துள்ளார். மேலும் அந்த குழந்தையை பார்த்த போது அவருக்கு இது தன்னுடைய குழந்தை இல்லை என்பது போல் நினைப்பு வந்துள்ளது.

இதனால் அவர் இரண்டு குழந்தைகளின் பிறப்பை பதிவு செய்த போதும், குழந்தைகளுக்கு DNA டெஸ்ட் எடுக்க வேண்டும் என்று முடிவு செய்துள்ளார்.

அதன்படி Fujian பகுதியில் இருக்கும் Forensic Identification Centre-ல் DNA சோதனை செய்துள்ளார். அதில் ஒரு குழந்தை இவருக்கு பிறந்தது என்றும் மற்றொரு குழந்தை இவருக்கு பிறக்கவில்லை என்பது தெரியவந்துள்ளது.

இதனால் அதிர்ச்சியடைந்த தந்தை இது குறித்து காவல்நிலையத்தில் புகார் அளித்துள்ளார். அப்போது அவரின் மனைவி இல்லை, தனது கணவர் பொய் கூறுகிறார் என்று மறுத்ததாக கூறப்படுகிறது. அதன் பின் தொடர்ந்து நடத்தப்பட்ட விசாரணையில், அவர் ஒரே இரவு மட்டும் கணவருக்கு தெரியாமல் வேறொரு நபருடன் நெருக்கமாக இருந்தது தெரியவந்துள்ளது.

இதனால் கணவர் மிகுந்த அதிர்ச்சியில் இருப்பதாகவும், அதுமட்டுமின்றி இரட்டை குழந்தைகள் எப்படி தனித்தனியாக இன்னொரு நபருக்கு பிறக்கும் என்ற சந்தேகமும் எழுந்துள்ளது. 

இதுகுறித்து மருத்துவர் வல்லூநர்கள் தெரிவிக்கையில் இது போன்று குழந்தைகள் பிறக்கும் எனவும், சுமார் 13,000 தம்பதிகளில் ஒரு தம்பதிக்கு அவ்வாறு நடப்பதுண்டு என தெரிவித்துள்ளனர். 

அதிவேக நெடுஞ்சாலையை பயன்படுத்துவோருக்கு இலத்திரனியல் அட்டை !!

Currently online
அதிவேக நெடுஞ்சாலையை பயன்படுத்துவோருக்காக புதிய இலத்திரனியல் அட்டையை அறிமுகப்படுத்துவதற்கு நடவடிக்கை மேற்கொள்ளப்பட்டுள்ளது.

இந்த புதிய ETC அட்டைக்காக எதிர்வரும் 11ஆம் திகதி வரையில் பதிவு செய்ய முடியும். 

புதிய கொடுப்பனவு மூலம் அதிவேக நெடுஞ்சாலையை பயன்படுத்தும் பொதுமக்களுக்கு கட்டணத்தை செலுத்தும் பணிகளை செயல்திறன் மிக்கதாக மேற்கொள்ள முடியும் இந்த வசதி தற்பொழுது கொழும்பு கட்டுநாயக்க அதிவேக நெடுஞ்சாலைக்கு மாத்திரம் உண்டு. 

ஜாஎல சீதுவ கட்டுநாயக்க இடமாறும் மத்திய நிலையத்தில் அட்டையை பதிவு செய்வதற்கான பணிகள் மேற்கொள்ளப்படுகின்றன.

இது தொடர்பான மேலதிக தகவல்களை 1969 என்ற உடனடி தொலைபேசி இலக்கம் மூலம் தொடர்புக் கொண்டு அறிந்துக்கொள்ள முடியும். 

கொழும்பு சுற்றுவட்ட வீதி தெற்கு அதிவேக நெடுஞ்சாலையில் பயணிக்கும் பொதுமக்களுக்கும் வழங்குவதற்கு திட்டமிடப்பட்டுள்ளது. வெளியேறும் பகுதியில் பணம் செலுத்தி பயணிக்கும் பொழுது மணித்தியாலத்துக்கு 250 வாகனங்கள் வரையறுக்கப்படுகின்றன. இந்த அட்டை அறிமுகப்படுத்தப்பட்ட பின்னர் மணித்தியாலத்துக்கு 1250 இற்கும் மேற்பட்ட வாகனங்கள் வெளியேறக்கூடியதாக இருக்கும். 

பண்டிகை காலத்திலும் அலுவலக நேரத்திலும் ஏற்படும் நெருக்கடி நிலையின்போது நிலவும் கியூ வரிசைக்கு இதன் மூலம் தீர்வு ஏற்படும் என்று பெருந் தெருக்கள் மற்றும் வீதி அபிவிருத்தி அமைச்சு தெரிவித்துள்ளது.

பிஸ்தா பருப்பில் உள்ள மருத்துவ குணங்கள் !!

Currently online
பிஸ்தா பருப்பில் உள்ள சத்துக்கள் உடலுக்கு ஆரோக்கியத்தை மட்டுமல்லாது, உடலில் உள்ள பல நோய்களையும் குணப்படுத்தக் கூடிய ஆற்றல் கொண்டது.

பிஸ்தா பருப்பு நாம் அனைவரும் அறிந்த ஒன்று தான். இதில் உள்ள சத்துக்கள் உடலுக்கு ஆரோக்கியத்தை மட்டுமல்லாது, உடலில் உள்ள பல நோய்களையும் குணப்படுத்தக் கூடிய ஆற்றல் கொண்டது. பிஸ்தா பருப்பில் வைட்டமின் மற்றும் தாது சத்துக்கள் உள்ளது. பிஸ்தா பருப்பில் உள்ள மருத்துவக்குணங்களை அறிந்து கொள்ளலாம்.

பிஸ்தா பருப்பு இரத்தத்தை சுத்திகரிப்பதில் முக்கிய பங்கு வகிக்கிறது. இது இரத்த நாளங்களில் உள்ள கொழுப்பை கரைத்து, இரத்தத்தை சுத்தமாக்குகிறது. ஹீமோகுளோபின் உற்பத்திக்கு இது ஒரு அவசியமான பொருளாக கருதப்படுகிறது. இது செல்களுக்கு ஆக்சிஜனையும் கொடுத்து, உடலை ஆரோக்கியமாக வைத்து கொள்கிறது.

பிஸ்தா பருப்பில் அதிக அளவில் வைட்டமின் பி6 உள்ளது. இது இரத்தத்தில் உள்ள வெள்ளையணுக்கள் உற்பத்தியை அதிகரிக்க செய்கிறது. அதுமட்டுமல்லாமல் இது செல்களுக்கு ஆக்சிஜனை கொடுக்கிறது. வெள்ளை மற்றும் சிவப்பு இரத்த அணுக்களை உற்பத்தி செய்து மண்ணீரல் மற்றும் நிணநீரைப் பராமரிப்பதிலும் முக்கிய பங்கு வகிக்கிறது.

பிஸ்தா பருப்பை தொடர்ந்து சாப்பிடும் போது, நமது நினைவாற்றலை அதிகரிக்க செய்கிறது. வைட்டமின் பி6 ல் ஹீமோகுளோபின் என்ற அமிலம் அதிகப்படுத்தக்கூடிய தன்மையும், ஆக்சிஜனை இரத்தஓட்டம் வழியாக செல்களுக்கு கொண்டு சேர்க்கும் பொறுப்பு மற்றும் ஆக்சிஜனின் அளவை அதிகரிக்கும் பணியையும் செய்கிறது. மேலும் தினமும் மாலையில் சூடான பாலில் பிஸ்தா பருப்பை ஊற வைத்து சாப்பிட்டால் நியாபக சக்தி அதிகரிக்கும்.

இந்த பருப்பை தொடர்ந்து சாப்பிடும் போது தோல் நோய்கள் வராமல் தடுக்கும் ஆற்றல் கொண்டது. இந்த பருப்பில் உள்ள வைட்டமின் ஈ ஆனது புறஊதாக் கதிர்களால் தோல் பாதிக்கப்படாமல் இருக்கவும், தோல் புற்றுநோய் ஏற்படாமல் இருக்கவும் உதவுகிறது.

இந்த பருப்பை நாம் தொடர்ந்து சாப்பிடும் போது, கண்நோய்கள் ஏற்படுவதில் இருந்து பாதுகாக்கிறது. இது கண்புரை நோய் ஏற்படாமல் தடுக்கிறது. கண்ணுக்கு தெளிவான பார்வையை கொடுக்கக் கூடியது.

இதய நோய் ஏற்படுவதில் இருந்து இந்த பருப்பு நம்மை பாதுகாக்கிறது. இதய நோய் அபாயத்தை குறைக்கும் சக்தி கொண்டது. மாரடைப்பு ஏற்படாமல் பாதுகாக்கிறது. இது உடலிலுள்ள கேட்ட கொழுப்புகளை கரைத்து, ஆரோக்கியம் தரும் எச்டிஎல் கொழுப்பை அதிகரிக்கக் கூடிய ஆற்றல் கொண்டது.

படப்பிடிப்பின் போது விஷாலுக்கு நேர்ந்த சோகம் !!

Currently online
விஷால் நடித்த 'அயோக்யா' திரைப்படத்தின் படப்பிடிப்புகள் முடிவடைந்து வரும் ஏப்ரலில் இந்த படம் வெளியாக அனைத்து ஏற்பாடுகளும் தயாராகி வருகிறது. 

இந் நிலையில் விஷாலின் அடுத்த படத்தை இயக்குனர் சுந்தர் சி இயக்கி வருகிறார்.

இந்த படத்தில் இடம்பெறும் ஒரு ஆக்சன் காட்சியின் படப்பிடிப்பு நடைபெற்றபோது எதிர்பாராத வகையில் விஷாலின் கையில் காயம் ஏற்பட்டது. 

இதனையடுத்து மருத்துவமனைக்கு சென்று விஷால் சிகிச்சை பெற்றுள்ளார். விஷால் கையில் கட்டுடன் உள்ள புகைப்படம் இணையதளங்களில் வைரலாகி வருகிறது. 

இந்த புகைப்படத்தை பார்த்த அவரது ரசிகர்கள், திருமணம் நெருங்கும் நேரத்தில் கவனமாக படப்பிடிப்பில் இருக்குமாறு அறிவுரை தெரிவித்து வருகின்றனர். மேலும் விரைவில் அவர் குணமடையவும் அவரது ரசிகர்கள் வாழ்த்து தெரிவித்து வருகின்றனர்.

விஷால்-சுந்தர் சி படத்தின் படப்பிடிப்பு தற்போது துருக்கியில் நடந்து வரும் நிலையில் விஷாலுக்கு காயம் ஏற்பட்டுள்ளது. இருப்பினும் திட்டமிட்டபடி துருக்கி படப்பிடிப்பு தொடரும் என்றும், விஷால் இல்லாத காட்சிகளின் படப்பிடிப்பு நடந்து வருவதாகவும் கூறப்படுகிறது. 

விஷாலுக்கு ஜோடியாக தமன்னா நடிக்கும் இந்த படத்தில் இன்னொரு நாயகியாக 'மாயநதி' படத்தில் நடித்த ஐஸ்வர்யா லட்சுமி நடிக்கவுள்ளார். இந்த படத்திற்கு யுவன்ஷங்கர் ராஜா இசையமைக்கின்றார்.

பீட்ரூட் போண்டா செய்வது எப்படி ?

Currently online

தேவையான பொருட்கள் :

பீட்ரூட் - 4
மிளகாய் - 3
துவரம் பருப்பு - அரை கப்
இஞ்சி துருவல் - சிறிதளவு
சோம்பு - அரை டீஸ்பூன்
அரிசி மா - 1 டேபிள்ஸ்பூன்
தேங்காய்த் துருவல் - கால் கப்
உப்பு, எண்ணெய் - தேவைக்கு
கறிவேப்பிலை - சிறிதளவு


செய்முறை 

பீட்ரூட், மிளகாயை துண்டுகளாக வெட்டிக்கொள்ளவும்.

துவரம் பருப்பை சிறிது நேரம் ஊறவைக்கவும்.

பின்னர் அதனுடன் இஞ்சி, மிளகாய், உப்பு ஆகியவற்றை சேர்த்து மிக்சியில் கொரகொரப்பாக அரைத்து கொள்ளவும்.

அதேபோல் பீட்ரூட்டையும் அரைத்துக்கொள்ளவும்.

பின்னர் இந்த கலவையுடன் தேங்காய் துருவல், அரிசி மா, சோம்பு, கறிவேப்பிலை ஆகியவற்றை சேர்த்து போண்டா பதத்துக்கு பிசைந்து கொள்ளவும்.

கடாயை அடுப்பில் வைத்து எண்ணெய் ஊற்றி சூடானதும் கைப்பிடி அளவு உருட்டி கொதிக்கும் எண்ணெயில் போட்டு பொரித்து எடுக்கவும்  சூப்பரான பீட்ரூட் போண்டா ரெடி. 

இளம் தாய் மற்றும் மகன் தூக்கில் தொங்கிய நிலையில் சடலமாக மீட்பு !!

Currently online
தூக்கில் தொங்கிய நிலையில் இளம் தாய் மற்றும் மகனின் சடலங்களை மீட்டுள்ளதாக பொலிஸார் தெரிவித்துள்ளனர்.

பலாங்கொட, மஹவலதென பகுதியில் தூக்கில் தொங்கி தற்கொலை செய்து கொண்ட இருவரது சடலங்களே இவ்வாறு மீட்கப்பட்டுள்ளதாக பொலிஸார் கூறியுள்ளனர்.

26 வயதுடைய பெண் ஒருவரது சடலமும் 5 வயதுடைய குறித்த பெண்ணின் மகனின் சடலமுமே இவ்வாறு மீட்கப்பட்டுள்ளது. 

சம்பவம் குறித்து பொலிஸார் தீவர விசாரணைகளை முன்னெடுத்துள்ளனர்.

வர்த்தக நிலையத்தில் போலி நாணயத்தாள்களை அச்சிட்டவர்கள் வசமாக சிக்கினர் !!

Currently online
மீட்டியாகொட, கிரலகஹ பிரதேசத்தில் போலி நாணயத்தாள்களை அச்சிட்ட இரண்டு பேர்  கைது செய்யப்பட்டுள்ளனர். 

இவ்வாறு கைது செய்யப்பட்டவர்களில் ஒருவருக்கு சொந்தமான வர்த்தக நிலையத்தில் வைத்து போலி நாணயத்தாள்கள் அச்சிடப்பட்டுள்ளதாக பொலிஸார் தெரிவித்தனர். 

பொலிஸாருக்கு கிடைத்த தகவலின் படி நேற்று இரவு சுற்றிவளைப்பு நடத்தப்பட்டுள்ளது. இதன்போது குறித்த வர்த்த நிலையத்தில் இருந்து 1000 ரூபா நாணயத்தாள்கள் 13உம், 100 ரூபா நாணயத்தாள்கள் 53உம் அச்சடிக்கும் இயந்திரமும் பொலிஸாரால் கைப்பற்றப்பட்டுள்ளன. 

இது தொடர்பான மேலதிக விசாரணைகளை மீட்டியாகொட பொலிஸார் ஆரம்பித்துள்ளனர்.

பிரம்மை...........!!!!!!!! சுஜா தவம்

Currently online
சண்டையிட்டு கொள்ளும் 
இமைகளுக்குள் சமரசம் 
செய்ய வந்ததோ 
இந்த தூக்கம்?

இடைவிடாது தூக்கத்தை 
கலைத்து தன் காதலை 
ஒப்புவிக்க துடிக்கிறதோ 
இந்த கனவுகள்?

உலகாளும் போட்டியில் 
முண்டியடித்துக் கொண்டு 
முன் பின் போட்டி போடும் 
அரசர்கள் தான் இந்த 
சூரிய சந்திரரோ?

உயிர் இன்னும் உடலில் 
இருப்பதை மறந்து 
துயில் கொள்ளும் 
மானிடரை தட்டி எழுப்பும் 
அலாரம் தான் இந்த சேவலோ?

மேடையில்லா அரங்கில் 
நீயா நானா காந்த குரல்கள் என 
சொல்லிக் கொள்ளாமல் 
போட்டி போட்டு தான் 
இந்த குயில்களும் குருவிகளும் 
இசைக்கின்றனவோ?

இயற்கையை இல்லை என்றாக்கும் முயற்சியில் 
என்னை வெல்ல யாருமில்லை என்ற 
கர்வத்தில் தான் கவிகளை 
காட்சி படுத்துகின்றேனோ நானும்?

  நன்றி 
சுஜா தவம்

ஐ.பி.எல். ; பெங்களூர் - மும்பை இன்று மோதல் !!

Currently online
ஐ.பி.எல். தொடரில் இன்றைய லீக் போட்டியில் பெங்களூர் ராயல் சேலஞ்சர்ஸ் - மும்பை இந்தியன்ஸ் அணிகள் மோதுகின்றன.


தொடக்க ஆட்டத்தில் சென்னை அணிக்கு எதிராக வெறும் 70 ரன்களில் சுருண்டு தோற்ற பெங்களூரு அணி சொந்த ஊரில் எழுச்சி பெற வேண்டிய நெருக்கடியுடன் களம் இறங்குகிறது.

கேப்டன் விராட் கோலி, வில்லியர்ஸ், ஹெட்மயர் ஆகியோர் தான் அந்த அணியின் பேட்டிங் தூண்கள் ஆவர். பவுலிங்கில் சுழற்பந்து வீச்சாளர் யுஸ்வேந்திர சாஹல் நம்பிக்கை அளிக்கிறார். ஆனால் அவருக்கு மற்ற பவுலர்களின் ஒத்துழைப்பு அவசியமாகும்.

முன்னாள் சாம்பியன் மும்பை இந்தியன்ஸ் அணியும் தனது முதல் லீக்கில் (டெல்லிக்கு எதிராக 37 ரன் வித்தியாசத்தில் தோல்வி) தோல்வியை தழுவியது. தொடக்க ஆட்டத்தில் தோள்பட்டை காயத்தால் பேட்டிங் செய்ய வராத வேகப்பந்து வீச்சாளர் ஜஸ்பிரித் பும்ரா உடல்தகுதியை எட்டிவிட்டதால் இன்றைய ஆட்டத்தில் களம் காணுவதில் சிக்கல் இருக்காது. யுவராஜ்சிங், டெல்லி அணிக்கு எதிராக அரைசதம் அடித்து கவனத்தை ஈர்த்தார். மறுபடியும் அதே போல் முத்திரை பதிப்பாரா? என்ற எதிர்பார்ப்பு நிலவுகிறது.

இந்திய அணியில் கேப்டன், துணை கேப்டன் என்ற அந்தஸ்தில் இருக்கும் விராட் கோலியும், ரோகித் சர்மாவும் ஐ.பி.எல். களத்தில் நேருக்கு நேர் எதிர்கொள்வது ரசிகர்களின் ஆர்வத்தை அதிகரித்துள்ளது.

முதல் வெற்றியை பெற இரு அணிகளும் முயற்சிக்கும் என்பதால் இன்றைய போட்டியில் விறுவிறுப்புக்கு பஞ்சம் இருக்காது.

ராகுலை குழந்தை என விமர்சித்த மம்தா பானர்ஜி !!

Currently online
ராகுல் ஒரு குழந்தை, அவர் குறித்து நான் எந்த கருத்தும் கூறமாட்டேன் என மேற்குவங்க முதல்வர் மம்தா பானர்ஜி தெரிவித்துள்ளார்.

கடந்த நான்கு நாட்களுக்கு முன்பு மேற்குவங்கத்தில் தேர்தல் பிரச்சாரம் மேற்கொண்ட ராகுல்காந்தி பொதுக்கூட்டத்தில் மேற்குவங்கத்தில், விவசாயிகளுக்குத் தேவையான எந்த திட்டங்களையும் மம்தா அரசாங்கம் முன்னெடுக்கவில்லை. மக்கள் நலப் பிரச்சனைகள் உட்பட எதற்காகவும் மம்தா பானர்ஜி யாருடனும் பேசுவது கிடையாது. யாருடைய பரிந்துரைகளையோ, கோரிக்கைகளையோ ஒருபோதும் அவர் ஏற்பதில்லை என்று மம்தாவை கடுமையாக குற்றம்சாட்டினார்.

இந் நிலையில், மேற்குவங்க அரசு குறித்த ராகுலின் குற்றச்சாட்டுகளுக்கு மம்தா பானர்ஜி இன்று தக்க பதிலடி கொடுத்துள்ளார். 

இதை தொடர்ந்து செய்தியாளர்களை சந்தித்த மம்தாவிடம், பிரதமர் வேட்பாளராக கருதப்படும் ராகுல் தங்கள் அரசு குறித்து குற்றம்சாட்டியது குறித்து கேள்வி எழுப்பினர். 

அதற்கு பதிலளித்த அவர், ராகுல் ஒரு குழந்தை, அவர் குறித்து நான் என்ன கூறுவது?. ராகுல் காந்தியை பாஜகவினர் ஏற்கனவே இதேபோல் 'பப்பு' என்று விமர்சித்து வருகின்ற நிலையில் மம்தாவும் அவரை குழந்தை என விமர்சித்துள்ளார். 

மக்களவை தேர்தலில் காங்கிரஸ் கட்சி மேற்குவங்கத்தில் திரிணாமுல் காங்கிரஸ் கட்சியுடன் கூட்டணி வைக்கும் என எதிர்பார்க்கப்பட்டது. எனினும், ராகுல் காந்தி டெல்லி மற்றும் மேற்குவங்கத்தில் கூட்டணி உடன்பாடு மேற்கொள்ளாமல் இரண்டு மாநிலங்களிலும் தனித்து போட்டியிட தயாராகி வருகிறார். அதன் காரணமாகவே பிரதமர் மோடியையும், மம்தாவையும் ஒரே மேடையில் ராகுல் விமர்சித்துள்ளார் என்று கூறப்படுகிறது.

லேடி சூப்பர் ஸ்டார் நயன்தாராவின் ''ஐரா'' திரைவிமர்சனம் !!!

Currently online
விஸ்வாசம் படத்தின் மெகா வெற்றிக்கு பிறகு நயன்தாரா நடிப்பில் இன்று திரைக்கு வந்துள்ளது ஐரா. படம் எப்படி வாருங்கள் பார்ப்போம்..

கதை:

யமுனா (நயன்தாரா) மக்கள் மெயில் என்கிற பத்திரிகையில் பணியாற்றி வருகிறார். அவரது வீட்டில் பெற்றோர் அவருக்கு மாப்பிள்ளை பார்க்க, உடனே வீட்டை விட்டு எஸ்கேப் ஆகிறார்.

வேலையில் இருந்து 2 மாதல் லீவ் போட்டுவிட்டு பொள்ளாச்சியில் இருக்கும் பாட்டி வீட்டுக்கு செல்கிறார். அங்கு பேய் இருப்பது போல காட்டி youtubeல் சம்பாதிக்கலாம் என பிளான் போட்டு, அவரது பாட்டி மற்றும் யோகி பாபு ஆகியோரது உதவியுடன் மிகவும் பிரபலமும் ஆகிறார். பின்னர் தான் அவருக்கு வருகிறது பெரிய பிரச்சனை. ஒரு நிஜ பேய் அவரை பயமுறுத்துகிறது.

அதே நேரத்தில் நடிகர் கலையரசன் பவானி என்பவரது பேய் தொடர் கொலைகளை செய்து வருவதை பார்க்கிறார். யமுனாவை கொலை செய்ய முயற்சிப்பதும் அதே பேய் தான்.

பிளாஷ்பேக்கில் பவானி (இதுவும் நயன்தாரா தான்) பிறந்தது முதல் சந்தித்த துயரங்கள் கறுப்பு வெள்ளையில் திரையில் வருகிறது. அவர் எப்படி இறந்தார், அவர் ஏன் நயன்தாராவை கொல்ல நினைக்க காரணம் என்ன என்பதை எமோஷனலாக காட்டுகிறது மீதி படம்.

படத்தை பற்றிய அலசல்:

எப்போதும் போல நயன்தாரா தன் நடிப்பால் இரண்டு ரோல்களிலும் கலக்கியுள்ளார். குறிப்பாக பவானி என்கிற கறுப்பான பெண் வேடத்தில் ஆவரது நடிப்பு அல்டிமேட். ஹோட்டலில் சட்டையுடன் பணியாற்றும் கெட்டப் துவங்கி கிளைமாக்ஸில் திருமண கோலத்தில் இருக்கும்போது கதறி அழுவது வரை பல காட்சிகளில் அவரது முகபாவனை மற்றும் நடிப்பு நம் கண்களிலேயே இருக்கும்.

"எல்லோருக்கும் சந்தோஷமா வாழனும்னு ஆசைதான். ஆனால் வாழ்க்கையே சந்தோசமா கிடைக்காத ஒருத்திக்கு வாழ்க்கையே ஆசை தான்" போன்ற பல வசனங்கள் ஈர்க்கிறது.

இயக்குனர் சர்ஜுன் முதல் பாதியில் வழக்கமான பேய் படம் போல கதையை நகர்த்தியிருந்தாலும், இரண்டாம் பாதியில் கதை எமோஷனலாக மாறுகிறது. முதல் பாதியில் வரும் பல சம்பவங்கள் அழுத்தமாக் இல்லாதது குறையாக தெரிந்தாலும், இரண்டாம் பாதி அதற்கு ஈடுகட்டுகிறது.

கறுப்பாக இருக்கும் நயன்தாரா ஏன் மற்றொரு நயந்தாராவை பழிவாங்க துடிக்கிறார் என்கிற கேள்வி தான் கிளைமாக்ஸ் வரை த்ரில்லாக வைத்திருந்தது.

மெட்ராஸ் கலையரசன் தான் நயன்தாராவிற்கு படம் முழுவதும் பயணிக்கிறார். நடிப்பில் ஓரளவு மெச்சூரிட்டி தெரிந்தது. நடிகர் யோகிபாபுவிற்கு படத்தில் அதிகம் வேலையில்லை. நயன்தாராவுடன் அவரது சீன்கள் பெரிதாக ஒர்க் அவுட் ஆகவில்லை. மற்ற ரோல்களில் நடித்திருந்தவர்கள் குறை கூற முடியாத அளவிற்கு தங்கள் பங்களிப்பை கொடுத்துள்ளனர்.

க்ளாப்ஸ்:

நயன்தாராவின் நடிப்பு .. இரண்டு கதாபாத்திரங்களிலும் கச்சிதமாக நடித்திருப்பது. குறிப்பாக பவானி ரோலில் அவரது பல சீன்கள் நம்மை கண்கலங்கவைக்கும் அளவுக்கு நடிப்பு இருக்கும்.

சுந்தரமூர்த்தி பின்னணி இசை மற்றும் ஆங்காங்கே பின்னணியில் வந்த பாடல்கள் பெரிய பிளஸ்.

ரசிக்கும்படியாக இருந்த ஒளிப்பதிவு மற்றும் த்ரில்லிங்காகவே வைத்திருந்த எடிட்டிங்.

பல்ப்ஸ்:

தமிழ் சினிமா வரலாற்றில் அனைத்து பேய் படங்களிலும் நாம் பார்த்த டெம்பிளேட்டை மீண்டும் பயன்படுத்தி அரைத்த மாவையே அரைத்திருப்பது. பேய் வருவதை காட்ட லைட் flutter ஆவது, மெழுகுவர்த்தி அனைவது, கதவு தானாக திறப்பது, பின்னாடி யாரோ ஓடிப்போவது போல சத்தம் கேட்பது, வௌவால் கூட்டமாக பறந்து வருவது என பல விஷயங்கள் படத்தின் முதல் பாதியில் நமக்கே சலிப்பை ஏற்படுத்திவிடும்.

பவானி பேய் ஏன் நயன்தாராவை பழிவாங்க துடிக்கிறது என அறிய நமக்கு பெரிய எதிர்பார்ப்பை ஏற்படுத்தி கடைசியில் வைத்த சின்ன ட்விஸ்ட் புஸ்வானமாக போனது சற்று ஏமாற்றம் அளிக்கலாம்.

மொத்தத்தில், குறைகள் சில இருந்தாலும் அதை ஒதுக்கிவைத்துவிட்டு ஐராவை நயன்தாராவிற்காக நிச்சயம் ஒருமுறை பார்க்கலாம்.

நீ மாஸ்ன்னா நான் டபுள் மாஸ் ; மிரட்டும் ''காஞ்சனா 3'' ட்ரெய்லர் இதோ !!

Currently online
ராகவா லாரன்ஸ் நடிப்பில் உருவாகி வரும் காஞ்சனா 3 படத்தின் ட்ரெய்லர் தற்போது வெளியாகி வைரலாகி வருகிறது.

தொடர்ந்து பேய் படங்களில் இயக்கி நடிப்பதில் அதிக ஆர்வம் காட்டிவரும் ராகவா லாரன்ஸ் நடிப்பில் அடுத்து உருவாகியுள்ள படம் காஞ்சனா 3. இப்படத்தை இவரே இயக்கியுள்ளார். 

இப்படத்தில் இவருடன் இணைந்து ஓவியா, வேதிகா, கோவை சரளா, மனோ பாலா, சூரி, மயில்சாமி, யோகி பாபு, சிம்ரன், கிஷோர், சத்யராஜ் ஆகியோர் பலர் நடித்துள்ளனர். இப்படத்திற்கு அம்ரேஷ் கணேஷ், சரவெடி சரண் ஆகியோர் பலர் நடித்துள்ளனர். 

கிட்டத்தட்ட ரூ.40 கோடி பட்ஜெட்டில் உருவாகியுள்ள இப்படத்தின் முதல் 2 பாடங்களின் லிரிக் வீடியோ அண்மையில் வெளியாகி நல்ல வரவேற்பைப் பெற்றது. 

இந் நிலையில், இப்படத்தின் ட்ரெய்லர் தற்போது வெளியாகியுள்ளது. இந்த டிரைலரின் ராகவா லாரன்ஸின் ஆக்ரோஷம் அண்ட சரசாரத்தை காக்கும் தாயை அழைக்கும் கோபம் எல்லாமே ரசிகர்களுக்கு பிடிக்கும் வகையில் அமைந்துள்ளது. 


மேலும், சம்மக்கா, திம்மக்கா, பொம்மக்கா, வாடி நீ மூழி…வட பத்திர காளி தாயே பேர் போன மந்திரம் காத்தவளே என்ற பேய் பாடலில் கொந்தளிக்கும் லாரன்ஸ்… 


எனக்கு ஒன்னுனா விட்டுட்டு போயிருவேன் என் பசங்களுக்கு ஒன்னுன்னா வெட்டிட்டு தான்டா போவேன்.. 

நெருப்பக் கூட தொடலாம்…கற்ப தொடக்கூடாது…! 

நீ மாஸ்ன்னா நான் டபுள் மாஸ்..! 

என்றெல்லாம் ராகவா லாரன்ஸ் வசனம் பேசியுள்ளார். 

இப்படம் வரும் ஏப்ரல் 19ஆம் திகதி வெளியாகவுள்ளது என்பது குறிப்பிடத்தக்கது. 

பொள்ளாச்சி விவகாரம் ; நக்கீரன் கோபாலுக்கு மீண்டும் சம்மன் !!

Currently online
பொள்ளாச்சி பாலியல் விவகாரம் தொடர்பாக நக்கீரன் கோபாலுக்கு மீண்டும் சி.பி.சி.ஐ.டி. பொலிசார் சம்மன் அனுப்பி உள்ளனர். 

பொள்ளாச்சி பாலியல் வழக்கில் கைது செய்யப்பட்ட பைனான்ஸ் அதிபர் திருநாவுக்கரசை சி.பி.சி.ஐ.டி. பொலிசார் 4 நாள் காவலில் எடுத்து விசாரணை நடத்தி வாக்குமூலம் பெற்றனர்.

அதனடிப்படையில் பொள்ளாச்சியை சேர்ந்த பார் உரிமையாளர் நாகராஜ்(28), கோவை தெற்கு மாவட்ட தி.மு.க. பொறுப்பாளர் தென்றல் செல்வராஜின் மகனும், நகர மாணவரணி அமைப்பாளருமான தென்றல் மணிமாறன் (27) ஆகியோருக்கு சம்மன் அனுப்பினார்கள்.

இதைத்தொடர்ந்து பார் நாகராஜ் நேற்று மாலை கோவையில் உள்ள சி.பி.சி.ஐ.டி. அலுவலகத்தில் ஆஜரானார். கைதான திருநாவுக்கரசு உள்ளிட்ட 4 பேருக்கும், பார் நாகராஜூக்கும் உள்ள தொடர்புகள் குறித்து கேட்கப்பட்டது. மாலை 5 மணி இரவு 9 மணி வரை 4 மணி நேரம் சி.பி.சி.ஐ.டி. பொலிசார் தீவிர விசாரணை நடத்தினர். 

பின்னர் வெளியே வந்த பார் நாகராஜ் நிருபர்களிடம் கூறியதாவது:-
பொள்ளாச்சி பாலியல் விவகாரம் தொடர்பாகவும், புகார் கொடுத்திருந்த கல்லூரி மாணவியின் அண்ணனை தாக்கியது தொடர்பாகவும் சி.பி.சி.ஐ.டி அதிகாரிகள் என்னிடம் பல்வேறு கேள்விகளை கேட்டனர். அதற்கு நான் முழு பதிலையும் அளித்துள்ளேன்.

என்னென்ன கேள்விகள் கேட்டார்கள் என்பதை சொல்ல முடியாது. திருநாவுக்கரசு அளித்த வாக்குமூலத்தின் அடிப்படையிலும் விசாரணை செய்தார்கள். இந்த விவகாரத்தை எதிர்க்கட்சிகள் முழுக்க முழுக்க அரசியல் ஆக்கிவிட்டார்கள் இவ்வாறு அவர் கூறினார்.

சம்மன் அனுப்பப்பட்டவர்களில் மற்றொருவரான தென்றல் மணிமாறன் சி.பி.சி.ஐ.டி. அலுவலகத்தில் ஆஜராகவில்லை. அதற்கு பதிலாக தி.மு.க சட்டத்துறை இணை செயலாளர் தண்டபாணி தலைமையில் தி.மு.க. வக்கீல்கள் ஆஜராகி, உயர்நீதிமன்ற வழிகாட்டுதல்கள் அடங்கிய கடிதங்களை சி.பி.சி.ஐ.டி பொலிசாரிடம் வழங்கினர். 

பின்னர் வக்கீல் தண்டபாணி நிருபர்களிடம் கூறியதாவது:-

சி.பி.சி.ஐ.டி விசாரணைக்கு ஆஜராகுமாறு, அதிகாலை 3 மணிக்கு மணிமாறன் வீட்டுக்குச் சென்று சம்மன் கொடுத்துள்ளனர். அதிகாலை 3 மணிக்கு கொடுப்பதன் மூலம் மன உளைச்சலை ஏற்படுத்த நினைக்கிறார்கள். பொள்ளாச்சி பாலியல் துன்புறுத்தல் தொடர்பான அனைத்து வழக்குகளும் சி.பி.ஐக்கு மாற்றப்பட்டுள்ளது என ஐகோர்ட்டு தெரிவித்துள்ளது. மணிமாறனுக்கு வழங்கிய சம்மனில் எந்த தகவல்களும் குறிப்பிடப்படவில்லை

இந்த வழக்கு சி.பி.ஐ.க்கு மாற்றப்பட்டுள்ளதால் அதுகுறித்த முடிவு தெளிவான பின்பே, மணிமாறன் சி.பி.சி.ஐ.டி அலுவலகத்தில் ஆஜராக முடியும். இவ்வாறு அவர் கூறினார்.

இந்த வழக்கு தொடர்பாக நக்கீரன் கோபாலுக்கு சி.பி.சி.ஐ.டி. பொலிசார் ஏற்கனவே சம்மன் அனுப்பி இருந்தனர். அதில் வருகிற 25-ந் திகதிக்குள் கோவையில் உள்ள சி.பி.சி.ஐ.டி. அலுவலகத்தில் ஆஜராகுமாறு கூறி இருந்தனர். ஆனால் அவர் ஆஜராகவில்லை.

இதையடுத்து வருகிற 30ஆம் திகதிக்குள் விசாரணைக்கு ஆஜராகுமாறு நக்கீரன் கோபாலுக்கு சி.பி.சி.ஐ.டி. பொலிசார் மீண்டும் சம்மன் அனுப்பி உள்ளனர். 

சாதாரண தரப் பரீட்சை பெறுபேறுகள் இன்று மாலை வெளியாகும் !!

Currently online
க.பொ.த சாதாரண தரப் பரீட்சையின் பெறுபேறுகள் இன்று வெளியிடப்படவுள்ளதாக பரீட்சைகள் ஆணையாளர் நாயகம் சனத் பூஜித கூறியுள்ளார்.

பெரும்பாலும் இன்று மாலையாகும் போது இணையத்தளத்தில் பெறுபேறுகள் வௌியடப்படும் என்று அவர் கூறியுள்ளார்.

அதன்பின்னர் www.doenets.lk என்ற இணையத்தளத்தின் ஊடாக பெறுபேறுகளை பார்வையிட முடியும் என்று தெரிவிக்கப்பட்டுள்ளது.

2018 கல்வி பொது தராதர சாதாரண தரப் பரீட்சையில் 656, 641 பரீட்சாத்திகள் பங்குபற்றியிருந்தமை குறிப்பிடத்தக்கது.


பாகிஸ்தானை வீழ்த்தி அவுஸ்திரேலியா அபார வெற்றி !!

Currently online
பாகிஸ்தானுக்கு எதிரான 3-வது ஒருநாள் போட்டியில் அவுஸ்திரேலியா 80 ரன் வித்தியாசத்தில் அபார வெற்றி பெற்று தொடரையும் கைப்பற்றியது. 

அவுஸ்திரேலியா- பாகிஸ்தான் அணிகள் மோதிய 3-வது ஒருநாள் போட்டி அபுதாபியில் நேற்று பகல்-இரவாக நடந்தது

முதலில் விளையாடிய அவுஸ்திரேலிய அணி 50 ஓவரில் 6 விக்கெட் இழப்புக்கு 266 ரன் குவித்தது.

கேப்டன் ஆரோன் பிஞ்ச் ‘ஹாட்ரிக்‘ சாதனை வாய்ப்பை தவற விட்டார். முதல் ஆட்டத்தில் 116 ரன்னும், 2-வது ஆட்டத்தில் 153 ரன்னும் குவித்த அவர் இந்த ஆட்டத்தில் 90 ரன்னில் ஆட்டம் இழந்தார்.

மேக்ஸ்வெல் 55 பந்தில் 71 ரன்னும் (8 பவுண்டரி, 1 சிக்சர்), ஹேண்ட்ஸ் ஹோம் 47 ரன்னும் எடுத்தனர்.

பின்னர் விளையாடிய பாகிஸ்தான் அணி 44.4 ஓவரில் 186 ரன்னில் சுருண்டது. இதனால் ஆஸ்திரேலியா 80 ரன் வித்தியாசத்தில் அபார வெற்றி பெற்றது. இமாம்-உல்- ஸ்ரீக் 46 ரன்னும், இமாத் வாசிம் 43 ரன்னும் எடுத்தனர். ஆடம் ஜம்பா 4 விக்கெட்டும், கும்மின்ஸ் 3 விக்கெட்டும் கைப்பற்றினார்கள்.

அவுஸ்திரேலியா ‘ஹாட்ரிக்’ வெற்றியை பெற்று தொடரை வென்றது. அந்த அணி முதல் ஆட்டத்தில் 8 விக்கெட் வித்தியாசத்திலும், 2-வது போட்டியில் 8 விக்கெட் வித்தியாசத்திலும் வெற்றி பெற்று இருந்தது.

ஏற்கனவே டெஸ்ட் தொடரையும் ஆஸ்திரேலியா 1-0 என்ற கணக்கில் கைப்பற்றி இருந்தது. 20-20 தொடரை பாகிஸ்தான் 3-0 என்ற கணக்கில் வென்று இருந்தது.

அவுஸ்திரேலியா- பாகிஸ்தான் அணிகள் மோதும் 4-வது ஒருநாள் போட்டி துபாயில் நாளை நடைபெறவுள்ளது.

மேன்முறையீட்டு நீதிமன்ற தலைவராக யசந்த கோதாகொட பதவிப்பிரமாணம் !!

Currently online
மேன்முறையீட்டு நீதிமன்றத்தின் தலைவராக ஜனாதிபதி சட்டத்தரணி யசந்த கோதாகொட, ஜனாதிபதி மைத்திரிபால சிறிசேனவின் முன்னிலையில் பதவிப்பிரமாணம் செய்து கொண்டுள்ளார். 

ஜனாதிபதி சட்டத்தரணி யசந்த கோதாகொடவின் பெயரை மேன்முறையீட்டு நீதிமன்றத்தின் தலைவர் பதவிக்காக ஜனாதிபதி முன்வைத்து இருந்ததுடன் அதற்கு சபாநாயகர் கரு ஜயசூரிய தலைமையிலான அரசியலமைப்பு சபை கடந்த வாரம் அனுமதி வழங்கியிருந்தது. 

அதனடிப்படையில் இன்று(28) அவர் பதவிப்பிரமாணம் செய்து கொண்டுள்ளமை குறிப்பிடத்தக்கது.

கோத்தபாய ராஜபக்ஷ அமெரிக்கா விஜயம் !!

Currently online
முன்னாள் பாதுகாப்பு செயலாளர் கோத்தபாய ராஜபக்ஷ இரண்டு வார கால சுற்றுலாவுக்காக நேற்று அமெரிக்கா பயணமாகியுள்ளார்.

எமிரேட்ஸ் விமான சேவை மூலம் அவர் நேற்று அமெரிக்கா சென்றதாக கோத்தபாய ராஜபக்ஷவின் அலுவலக பேச்சாளர் ஒருவர் தெரிவித்துள்ளார்.

மேலும், குடும்ப அங்கத்தவர்களுடன் இரு வாரம் தங்கியிருக்க அவர் அமெரிக்கா சென்றுள்ளதாகவும் மீண்டும் எதிர்வரும் மாதம் 12ம் திகதி நாடு திரும்புவார் எனவும் அலுவலக பேச்சாளர் குறிப்பிட்டுள்ளார்.

எதிர்வரும் ஜனாதிபதி தேர்தலில் பொதுஜன பெரமுன கட்சியின் வேட்பாளராக கோத்தபாய ராஜபக்ஷ தெரிவு செய்யப்படுவார் என்ற செய்திகள் வெளியாகி வரும் நிலையில் அவர் தனது அமெரிக்க பிரஜாவுரிமையை நீக்க நடவடிக்கை எடுத்திருப்பதாகவும் செய்திகள் வெளியாகியிருந்தமை குறிப்பிடத்தக்கது.

அரச வங்கியொன்றில் இன்று அதிகாலை தீ விபத்து !!

Currently online
அரச வங்கியொன்றில் இன்று அதிகாலை தீ விபத்து ஏற்பட்டுள்ளது. 

தெஹிவளை காலி வீதியில் அமைந்துள்ள அரச வங்கியொன்றிலேயே இன்று அதிகாலை 12.15 மணியளவில் தீ விபத்து ஏற்பட்டுள்ளது.

தகவல் அறிந்து உடனே செயற்பட்ட தெஹிவளை பொலிஸார் மற்றும் தீயணைப்பு படையினர் இணைந்து தீயை கட்டுப்படுத்தியுள்ளனர். 

தீயினால் உயிர்ச் சேதங்கள் ஏற்படாத போதிலும் ஏற்பட்ட பொருட் சேதம் குறித்து இதுவரை கணிப்பிடப்படவில்லை.

தீப்பரவலுக்கான காரணமும் இதுவரை கண்டறியப்படாத நிலையில் மேலதிக விசாரணைகளை தெஹிவளை பொலிஸார் ஆரம்பித்துள்ளனர்.

Wednesday, March 27, 2019

சூப்பர் டீலக்ஸ் ஷில்பாவை சைட் அடித்தேன் ; வெளிப்படையாக கூறிய நடிகை !!

Currently online
சூப்பர் டீலக்ஸ் படத்தில் நடித்தபோது காயத்ரி ஒருவரை சைட் அடித்துள்ளார். 

தியாகராஜன் குமாரராஜா இயக்கத்தில் விஜய் சேதுபதி, ஃபஹத் ஃபாசில், சமந்தா, ரம்யா கிருஷ்ணன், காயத்ரி உள்ளிட்டோர் நடித்துள்ள சூப்பர் டீலக்ஸ் படம் வரும் 29ம் திகதி ரிலீஸாகிறது. 

இந்நிலையில் படம் குறித்து காயத்ரி கூறியதாவது,

தியாகராஜன் குமாரராஜா நிஜத்தில் அமைதியானவர். ஆனால் ஷூட்டிங் ஸ்பாட்டுக்கு வந்தால் ஆளே மாறிவிடுவார். தான் விரும்பியதை திரையில் கொண்டுவர மெனக்கெடுவார். அவரா இவர் என்று ஆச்சரியமாக இருக்கும்.
எனக்கு எப்பொழுதுமே முதல் டேக் தான் நன்றாக வரும். இந்த படத்தில் நமக்கு எத்தனை டேக் வரப் போகுதோ என்று பயந்தேன். நல்ல வேளை அதிக டேக்குகள் வரவில்லை. விஜய் சேதுபதியுடன் சேர்ந்து நடிக்கும்போது எங்களுக்கு இடையே நடிப்பில் போட்டி இருக்கும்.

சூப்பர் டீலக்ஸ் ஷில்பா கதாபாத்திரம் எனக்கு மிகவும் பிடித்துள்ளது. விஜய் சேதுபதியின் ஆண் தோற்றத்தை அந்த அளவுக்கு சைட் அடிக்கவில்லை. ஆனால் ஷில்பாவை கண்டமேனிக்கு சைட் அடித்தேன். ட்ரெய்லரை பார்த்த பிறகு உங்களை பார்த்தால் பொறாமையாக இருக்கிறது என்று விஜய் சேதுபதியிடம் கூறினேன் என்றார் காயத்ரி.

அதர்வா - ஹன்சிகா நடித்த 100 படத்தின் ரிலீஸ் திகதி அறிவிப்பு !!

Currently online
அதர்வாவின் 100 படத்தின் ரிலீஸ் திகதி அதிகாரபூர்வமாக அறிவிக்கப்பட்டுள்ளது. 

'டார்லிங்' இயக்குனர் சாம் அன்டன் இயக்கத்தில் அதர்வா நடிக்கும் படம் 100. காவியா வேணுகோபால் தயாரிக்கும் இந்த படத்திற்கு சாம் சி.எஸ் இசையமைக்கிறார். 

இப்படத்தில் அதர்வா பொலிஸாக  நடிக்க ஹன்சிகா அதர்வாவுக்கு  ஜோடியாக நடித்துள்ளார். இசையை சாம் சி.எஸ் அமைத்துள்ள இப்படத்திற்கு  ஆண்டனி ரூபன் படத்தொகுப்பாளராக பணி புரிந்துள்ளார்.  

அண்மையில் இப்படத்தின் படத்தின் ஃபர்ஸ்ட் லுக் போஸ்டரை பிரபல இயக்குனர் ஏ.ஆர்.முருகதாஸ் தனது டுவிட்டரில் வெளியிட்டார்.  

அதனை தொடர்ந்து மோஷன் போஸ்டர் வெளியிடப்பட்டிருந்தது இந் நிலையில் தற்போது இப்படம்  மே 3ல் திரையிடப்படும் என படக்குழு அறிவித்துள்ளனர்.

இந்த படத்தில் அதர்வா சத்யா என்ற பொலிஸ் கரக்டரில் நடிக்கிறார். 100 என்பது காவல்துறைக்கான அவசர எண் என்பதால் அதையே தலைப்பாக வைத்திருப்பதாக படக்குழுவினர் தெரிவித்தது குறிப்பிடத்தக்கது.

O/L பரீட்சை பெறுபேறுகள் நாளை அதிகாலை வெளியாகும் !!

Currently online
2018 ஆம் ஆண்டு நடைபெற்ற க.பொ.த சாதாரண தர பரீட்சை பெறுபேறுகள் நாளை அதிகாலை வெளியிடப்படவுள்ளதாக பரீட்சைகள் ஆணையாளர் நாயகம் சனத் பூஜித்த தெரிவித்துள்ளார்.

பெறுபேறுகளை பரீட்சை திணைக்களத்தின் www.Doennets.lk/exam  என்ற இணையத்தளத்தின் மூலம் அறிந்துக் கொள்ள முடியும். 

கடந்த ஆண்டு டிசம்பர் மாதம் நடைபெற்ற சாதாரண தர பரீட்சையில் 6,56,641 பரீட்சார்த்திகள் தோற்றியுள்ளமை குறிப்பிடத்தக்கது.

சிறுநீரக பாதிப்பு ஏற்படும் முன் காணப்படும் சில அறிகுறிகள் !!

Currently online
சிறுநீரக பாதிப்பு ஏற்படும் முன்பு சில அறிகுறிகள் ஏற்படும். அதனை நாம் கண்டறிந்து உடனே சிகிச்சை எடுத்துக் கொண்டால் பல பெரிய பாதிப்புகளை தவிர்த்து விடலாம்
சிறு நீரகத்தின் முக்கியத்துவத்தினை அறியாதவர் இல்லை எனலாம். கழிவுகளை நீக்குவதில் இதற்கு பெரும் பங்கு உண்டு. உடலின் திரவ நிலையினை சீராக வைக்கும். இரத்த அழுத்தம் சீராய் இருக்க சிறுநீரகம் அளிக்கும் ஹார்மோன் மிக முக்கியமானது என பல முக்கிய பவன்களை அடுக்கி கொண்டே செல்லலாம்.

சிறுநீரக பாதிப்பு என்றதும் அனைவருமே அதிக கவனம் செலுத்துவர். ஆனால் பாதிப்பு ஏற்படும் முன்பு சில அறிகுறிகள் ஏற்படும். அதனை நாம் கண்டறிந்து உடனே சிகிச்சை எடுத்துக் கொண்டால் பல பெரிய பாதிப்புகளை தவிர்த்து விடலாம்.

கீழ் முதுகு வலி

* கீழ் முதுகு வலி என்றாலே சிறு நீரக பிரச்சினை என்று பொருள் அல்ல. ஆனால் சிறுநீரக பாதிப்பு ஏற்படும் பொழுது கீழ் முதுகு வலி ஒரு புறமோ அல்லது இரு புறமோ இருக்கும். சிறுநீர் சென்ற பின் வலி குறைவது போல் இருக்கும்.

* சிறுநீர் வெளிர்த்தோ (அ) மிக அடர்ந்தோ இருக்கும், மிகச்சிறிய அளவோ (அ) மிக அதிக அளவிலோ சிறுநீர் வெளியாகும். சிறுநீர் இரத்தம் கலந்து இருக்கலாம். இத்தகைய மாறுதல்கள் சிறுநீரக பாதிப்பின் அறிகுறிகள் ஆகும்.

* கை, பாதம், கால், கனுக்கால், முகம் இவற்றில் வீக்கம் இருந்தால் சிறுநீரகங்கள் உடலின் கழிவுகளை சீராக வெளியேற்றவில்லை என கண்டு கொள்ளலாம். இதற்கு உடனடியாக மருத்துவ சிகிச்சை பெற வேண்டியது அவசியம்.

* சீராக இயங்காத சிறுநீரகத்தினால் உடலில் வறட்சி,. சரும பிடிப்பு, அரிப்பு ஆகியவை ஏற்படும்.

இப்படிப்பட்ட அறிகுறிகளை உடனடியாக கவனிப்பது சிறுநீரக பாதுகாப்பிற்கு உதவும்.
மேலும்
* புகை பிடிக்காது இருப்பது
* தேவையான நீர் குடித்தல்
* காய்கறி சாறு குடித்தல்

நல்ல உடற்பயிற்சி இவையும் சிறுநீரகத்தினைப் பாதுகாக்கும்.

கீழ்கண்ட பழக்கங்கள் பழக பழக நிறைந்த பலன் அளிக்கும்.

* எலுமிச்சை சாறு+ தேன் கிரீன் டீ
 வெது வெதுப்பான நீர் இவற்றில் ஏதாவது ஒன்றினை காலை வெறும் வயிற்றில் தொடர்ந்து அருந்தி வர நிறைந்த பலன் கிடைக்கும்.

* 10-20 நிமிடம் அன்றாட தியானம்

* 30 நிமிடம் அன்றாட பயிற்சி, யோகா

* 15 - 20 நிமிடம் ஏதேனும் நல்ல புத்தகம் படித்தல்

* புரதம், நார் சத்து நிறைந்த அன்றாட காலை உணவு

* ஒவ்வொரு உணவுக்குப் பின்பும் 10 நிமிடம் நடத்தல்

* எப்பொழுதும் நம்மை மகிழ்ச்சியாய் வைத்திருத்தல்

* 2 லிட்டர் தண்ணீர் அன்றாடம் குடித்தல்

* அன்றாடம் காய்கறி சாலட், பழம், இவற்றினை உண்ணுதல், போன்ற பழக்கங்களை தினமும் விடாது கடை பிடிக்க குறையாமல் ஆரோக்கியம் நிலைக்கும்.

மனநல, உடல்நல பாதுகாப்போடு செய்யும் வேலைகளை வெற்றிகரமாக செய்து முடிப்பவர்களைப் பற்றிய ஆய்வு ஒன்று மேற்கொள்ளப்பட்டது. ஆய்வின் முடிவாக சில கருத்துக்கள் கூறப்பட்டுள்ளன. அவை.

* உடல்நல, மனநலத்தோடு இருப்பவர்கள் எப்பொழுதும் சுத்தமான ஆடைகளையும், சுகாதாரமான தோற்றத்தினையும் உடையவர்களாக இருக்கின்றனர். எனவே துவைத்த ஆடைகளை அணியுங்கள். வீட்டில் இருக்கும் பெண்கள் பகலில் கூட பழைய நைட்டியும், முடிந்த தலையுமாக இருப்பது அவர்கள் மன நலத்தினை பாதிக்கும் என்பதனை உணர வேண்டும்.

* காலை உணவினை எப்பொழுதும் தவிர்ப்பதில்லை.

* மதிய உணவில் அதிக கொழுப்பு இல்லாத சத்தி நிறைந்த, காய்கறி, பழங்கள் நிறைந்த உணவாக தவறாது எடுத்துக் கொள்கின்றனர்.

* பல வேலைகளை ஒரே நேரத்தில் போட்டுக் கொண்டு பரபரவென்று செய்யாமல் நிதானமாய் முறைப்படி செய்கின்றனர்.

* எட்டு மணி நேரத்திற்கு குறையாமல் தூங்குகின்றனர்.

* எதிலும் மனதினை ஒருநிலைப்படுத்தி வேலை செய்கின்றனர்.

* பொதுவில் திருமணமானவர்கள் குடும்ப உறவுகளின் அன்பினால் வாழ்வினை மகிழ்ச்சியாய் எதிர் கொள்கின்றனர். இவற்றினை நாமும் கடைப்பிடித்து உடல் நலமும், மன நலமும், வாழ்வில் வெற்றியும் பெறுவோம்.

அதிரடி சோதனை ; போதை மாத்திரைகளுடன் வசமாக சிக்கிய நபர் !!

Currently online
ஒரு தொகை போதை மாத்திரைகளுடன் கண்டி நகரில்  நபர் ஒருவர் கைது செய்யப்பட்டுள்ளார். 

குறித்த சந்தேக நபரிடம் இருந்து 542 ட்ரமடோல் மாத்திரைகளும் 856 கருக்கலைப்பு மாத்திரைகளும் கைப்பற்றப்பட்டுள்ளது. 

குற்றத்தடுப்பு பிரிவினருக்கு கிடைத்த தகவலின் அடிப்படையில் மேற்கொள்ளப்பட்ட சுற்றிவளைப்பின் போதே குறித்த நபர் கைது செய்யப்பட்டுள்ளார். 

இவ்வாறு கைது செய்யப்பட்டுள்ளவர் தலாதுஓய பகுதியை சேர்ந்த 37 வயதுடைய நபராவார்.

கண்டி பொலிஸார் இச் சம்பவம் தொடர்பான மேலதிக விசாரணைகளை மேற்கொண்டு வருகின்றனர்.

மனதை கவர்ந்தவளே...........!!!!!!!! பூநகர் சாந்

Currently online
உள்ளத்தை ஈர்த்தவள்
இதயத்தில் குடிகொண்டாள்
உண்மையான அன்பிலே
தேவதையாய் தோன்றினாள்

மதிமுக அழகியவள்
மன்மதனாய் எனைமாற்றி
காற்றிலே பறக்கவிட்டாள்
கற்பனையில் மிதக்கவிட்டாள்

காதல் கணையை
கச்சிதமாய் எய்துவிட்டாள்
இரவின் அழகை
இனிமையாய் இரசிக்கவிட்டாள்

வாழ்க்கையில் இன்பத்தோடு
துணையாக வரவே
கனவிலே தேடுகின்றேன்
கிறுக்கலினை வரைகின்றேன்

     நன்றி 
பூநகர் சாந் 

30 ஆயிரம் உலக வரைபடங்களை அழித்த சீனா !!

Currently online
தைவானை தனி நாடாகவும், இந்தோ-சீனா எல்லையை தவறாகவும் வரையறை செய்திருந்ததாக கூறி சுமார் 30 ஆயிரம் உலக வரைபடங்களை சீன குடியுரிமை அதிகாரிகள் கைப்பற்றி, அவற்றை அழித்தனர்.

இந்தியாவின் வடகிழக்கு மாநிலமான அருணாசலபிரதேசத்தை தங்களது பகுதி என சீனா உரிமை கொண்டாடி வருகிறது. இதன் காரணமாக இந்திய தலைவர்கள் அருணாசலபிரதேசத்துக்கு செல்கிறபோது, சீனா அதனை கண்டித்து தனது எதிர்ப்பை முன்வைக்கிறது. அதே சமயம் அருணாசலபிரதேசம் இந்தியாவின் ஒருங்கிணைந்த மற்றும் பிரிக்க முடியாத பகுதி என்பதில் இந்தியா உறுதியாக உள்ளது.

இதேபோல், தங்களிடம் இருந்து பிரிந்து சென்ற தைவான் தொடர்ந்து தங்களின் கட்டுப்பாட்டில் இருப்பதாகவே சீனா கூறிவருகிறது. இதன்காரணமாக சீனாவில் தயார் செய்யப்படும் உலக வரைபடங்களில் அருணாசலபிரதேசம் மற்றும் தைவான் அந்நாட்டின் ஒருங்கிணைந்த பகுதிகளாக குறிப்பிடப்படுகிறது.

இந்த நிலையில், தைவானை தனி நாடாகவும், இந்தோ-சீனா எல்லையை தவறாகவும் வரையறை செய்திருந்ததாக கூறி சுமார் 30 ஆயிரம் உலக வரைபடங்களை சீன குடியுரிமை அதிகாரிகள் கைப்பற்றி, அவற்றை அழித்தனர். 

இது குறித்து மூத்த அதிகாரி ஒருவர் கூறுகையில், “வரைபட சந்தையில் சீனா என்ன செய்ததோ அது முற்றிலும் சட்டபூர்வமானதும் அவசியமானதுமாக இருந்தது. ஏனென்றால் இறையாண்மை மற்றும் பிராந்திய ஒருமைப்பாடு ஒரு நாட்டிற்கு மிக முக்கியமானவை ஆகும்” என்றார்.

Responsive Full Width Ad


Copyright © 2016 Yarlitrnews, powered by Suj.